لاہوری تا مہمانداری ءِ اسل است آن دننگ کپروٹ، انتونیوگوتریس نا ٹویٹ
اسلام آباد۔ 19 فروری (اے پی پی) اقوام متحدہ نا سیکرٹری جنرل انتونیوگوتریس پاکستان نا چاردے ئی دورہ ءِ پورو کرسا چارشنبے نادے آ سہب انا وختی پدی رادہ مس۔ لاہور نا علامہ اقبال انٹرنیشنل بالی پٹ آن روانہ مننگ آن مست تینا ٹویٹ اٹی اوپاکستان نا الس نا منت واری ءِ ہرفے۔ نجی ٹی وی چینل نا رداٹ جہانی ادارہ نا سروک انتونیوگوتریس تینا ٹویٹ اٹی پارے کہ ای پاکستان نا دورہ ءِ پورو کرسا پدی ہِننگ اُٹ، دادورہ ٹی جہانی دودوربیدہ میرات گوندنگوک آ شاہی قلعہ و بادشاہی مسیت ءِ ہرا و دورہ نا ایسر آ لاہور نا تاریخ و متحرک دودوربیدہ غان لطف اندوز مرسا کرے۔ داشان دار دورہ غا پاکستان نا الس نا منتوار ی ءِ ہرفیوہ۔ داکان مست لاہور بالی پٹ آ اقوام متحدہ ٹی پاکستان نا آخبتی مندوب منیر اکرم سیکرٹری جنرل ءِ رخصت کرے، انتونیوگوتریس ڈیہہ ٹی امن کن پاکستان نا کوشست آتا ستاءِ کرے، و دہشت گردی ءِ شکست تننگ آ پاکستان نا کوشست آتا ستاءِ کرے۔ اوپارے کہ لاہور والا تا مہمانداری ءِ اسل است آن دننگ کپروٹ۔ تدوک آدے سیکرٹری جنرل لاہور اٹی حضوری باغ اٹی تینا شرف اٹی وزیراعلیٰ پنجاب و گورنر نا کنڈآن تروک آ شام انا اِرغ اٹی پاریسس کہ پنجاب دودوربیدہ حسن آن مالامال ءِ، لاہوری تا مہمان داری نا چس ءِ اسل است آن دننگ کپروٹ۔ داوخت آ بلوچی، چولستانی، پنجابی سازوزیمل و دودوربیدہ شوہم پیش کننگاسس۔ اوتینا دورہ پاکستان ءِ شاندار گوندسا پبی پاکستانی دودوربیدہ نا ستاءِ کرے و پاکستانی الس نا منت واریءِ ہرفے۔ اوکرتارپور راہداری ءِ امن کن پاکستان نا است خواہی نا عملی مثال گوندا۔ پی آئی او محمد طاہر حسن سیکرٹری جنرل ءِ عکس آتا البم اس پیش کرے۔ سیکرٹری جنرل لاہور اٹی حکومتی عہدیدار آتون اوڑدہی کرے۔ اودربار صاحب کرتارپور نا دورہ ءِ ہم کرے ہراڑے اودے پاکستانی حکومت نا کنڈآن سکھ برادری کن فراوان کروک آ آسراتی تا بارواٹی حوال تننگا۔ اواقوام متحدہ نا امن مشن کن افرادی قوت نا فراوانی آ پاکستان نا ستاءِ کرے۔ اوجہانی امن مشن اٹی اوار پاکستانی سیکورٹی کارندہ غاتا دلیری و قربانی تا ہم ستاءِ کرے۔ تینا دورہ پاکستان اٹی سیکرٹری جنرل وزیراعظم عمران خان و پاک فوج انا سروک جنرل قمر جاوید باجوہ تون اوڑدہی کرے و اسلام آباد اٹی اوغان باہوٹ آتا بارواٹی جہانی کانفرنس اٹی بشخ ہلک۔ اوپارے کہ کشمیر نا بارواٹی اقوام متحدہ نا قرارداد آتیا عملدرآمد کننگے۔
