اسلام آباد۔ 19 فروری (اے پی پی) وزیراعظم نا سلاہکار خصوصی امور نوجوانان عثمان ڈار پارینے کہ وزیراعظم عمران خان کنوئی آ گڑاتا کبین مننگ آ حکومتی ڈیوالائی ءِ امنا کرسا ہرا روایت ءِ شاغانے اونا مٹ مستین اٹی اسہ حکومت اسے نا کنڈآن ہم ملپک۔ نجی ٹیلی ویژن چینل نا پروگرام اٹی گپ وتران کرسا اوپارے کہ کنوئی آ گڑاتا کبین مننگ آ حکومتی ڈیوالائی ءِ امنا کننگ آ ای تینا لیڈر وزیراعظم عمران خان ءِ خراج تحسین پیش کیوہ۔ اوپارے کہ کبینی نا سوب آن مسکوہی حکومت آتا کنڈآن زرگزرانی بدانتظامی و ننے میرات اٹ ملوک آ روبہ زوال زرگزران ئس ہرادے سہی کنڈا دننگ اٹ یک ونیم سال انا وخت لگا۔ اوپارے کہ مستین اٹی ہلوک آ وام تا سوب آن ملکی زرگزران بھاز بے وڑ زہمی مس و ڈالر 160 نا خڑک آ سرمس۔ پٹرول، بجلی، گیس نا نہاد آتے ٹی ہم ہنداسوب آن ودکی مس ہرانا مچ آ بھاریم براہ راست الس آ تما۔ عثمان ڈار مستی پارے کہ ای قوم ءِ باوری کرفیوہ کہ حتمی رپورٹ بننگ آن پد ہراخلقت ڈیوالائی و ذخیرہ اندوزی نا زموار مسر اوغٹ بندغ آتابرخلاف بے پرخ کارروائی کننگک، اوفتا پن تے ہم مون آ اتنگک و اوغٹ ءِ اوفتا کروک نا سزا تننگک۔ اوپارے کہ تحریک انصاف ہمو اسٹ انگا جماعت ءِ ہرا سینیٹ گچین کاری تیٹی ضمیر فروشی نا جاست وپاست آن پد اونا زموار باسک آتے پارٹی آن کشاسس۔
