اسلام آباد۔ 19 فروری (اے پی پی) چیئرمین کشمیر کمیٹی سید فخر امام اقوام متحدہ نا سیکرٹری جنرل انتونیوگوتریس نا مقبوضہ کشمیر اٹی انسانی حق آتا لتاڑ تے تالان کننگ نا بیان نا ستاءِ کرینے۔ ٹی وی پروگرام اٹی گپ و تران کرسا اوپارے کہ مقبوضہ جموں و کشمیر نا معاملہ غا اقوام متحدہ نا سیکرٹری جنرل نا بے کنڈ ہلوک تران دیرپا پاکستانی موقف نا مخ تفی ءِ۔ اوپارے کہ داسہ وخت بسنے کہ حکومت دا ویل ءِ تالان کننگ کن چندی ملک آتیا ڈل آتے گدریفے، مقبوضہ جموں و کشمیر اٹی بھارتی فوج انا بیدادی تے پاش کننگ کن جہانی میڈیا مہم نا بناءِ کرینے۔ فخر امام پارے کہ پاکستان نا برخلاف ساڑی آ بھارتی پروپیگنڈا غا پاکستان ءِ جہانی برادری ءِ پت اٹ ہلکونے۔ سید فخر امام پارے کہ مودی بے گناہ کشمیری تیا ظلم ءِ برجاتخانے و بے سوب اوفتا خون ءِ کننگ ءِ ولے داسہ اونا مذموم عزم جہانی کہول آ بے نقاب مسنے۔ فخر امام پارے کہ کشمیریک تدوک آ 70 سال نا تاریخ نا مشکل انگا وخت آن گدرینگ انگ ءُ۔ اواومیت ظاہر کرے کہ کشمیر نا معاملہ غا غٹ سیاسی جماعت آک اسہ پنہ غاٹو و مچ آ قوم یکجاءِ ہنداخاطرآن پاکستان ہر کہول آ بھارتی حکومت نا اصل دروشم ءِ بے نقاب کرسا کیک۔
