اسلام آباد۔18فروری (اے پی پی) ورناہ آنی پلاحء ُ بہبود ءِ ھاترءَ حکومتی کوشستاناں میاں اوستمانی تکءَ ساڑاہگ بوتگ، اقوام متحدہ ءَ پہ ورناہ آنی ھاترءَ چست کتگیں گامگیج ساڑاتگ اَنت۔ اے ھیالانی درشانی سیکرٹری جنرل اقوام متحدہ انتونیو گوترسءَ مزن وزیر ءِ حاسیں کمک کار عثمان ڈارءَ گوں گندء ُنندکنانءَ کتگ۔ سیکرٹری جنرل اقوام متحدہ ءَ پہ ورناہ آنی ھاترءَ بندات کتگیں پروگرام ءَ را ساڑاتگ۔ آئیءَ پہ ورناہ آنی دیمروئی کنگءِ ھاترءَ پاکستان ءِ کمک کنگءِ صلہ جتگ۔ سیکرٹری جنرل ءَ گشتگ کہ سوبمندیں ورناہ پروگرام پہ ورناہ آنی روزگارءِ درساں چہ مستریں منصوبہ اِنت، اقوام متحدہ اے وڑیں منصوبہ آناں کمک کنگءِ وائشت مند اِنت۔ آئیءَ گشتگ کہ یواین پلیٹ فارم پاکستانی ورناہ آنی دیمروئی ءِ ھاترءَ پیسرءَ چہ شریدار اِنت۔ مزن وزیرءِ حاسیں کمک کار عثمان ڈار ءَ آئیءِ صلہ جنگءِ سرءَ وشیءِ درشانی کتگء ُ گشتگ کہ مزن وزیرءِ پنت ء ُ شونءِ سرءَ پہ ورناہ آں جوانیں پروگرام جوڑ کتگ۔ اے پروگرام ءِ مول ء ُ مراد و ورناہ آناں وت واک کنگ اِنت۔ آئیءَ گشتگ کہ ہنر ء ُ تربیت ءِ پجارینگ ءِ ھاترءَ درساں چہ مستریں اسکل ڈویلپمنٹ پروگرام بندات کنگ بوتگ۔ اقوام متحدہ ءِ گوما ہوار پہ ورناہ آنی ھاترءَ حاسیں گامگیج چست کناں۔
