لاہور۔18 فروری(اے پی پی)اقوام متحدہ ءِ سیکرٹری جنرل انتونیو گوتریس ءَ گوشت کہ ایٹماسپئیر ءِ ھرابی مرچگیں زمانگ ءِ ٹوھیں جیڈھ ات، موسمی مٹ ءُُ بدلی ءِ رد ءَ منصوبگ جوڑ کنگ لوٹ لوٹ ایت، میاں اوستمانی تک ھم ملک آنی نیام ءَ یکوئی بروبری نیست، مردم ءُُ ملک آنی نیام ءَ یکوئی برجا کنگ آسانی نہ انت، دراج بُریں کار ات، 21بیست ءُُ یکمی کردن ءَ ورنا آنی یونائیٹڈ نیشن ءَ ارزشتی ایں کرد ءِ بیت، ورنا نوکیں زمانگ ءِ ٹیکنالوجی ءَ گوں سرپد ءُُ سئیگ کنگ لوٹ ایت، آیوکیں باندات ءَ را دیم ءَ ایر کنان ءَ سلیبس ءِ تہ ءَ مٹ ءُُ بدلی کنگ لوٹ ایت، ایمنی ءِ واستہ پاکستان ءِ کربانی آناں بے ھیال کت نہ کناں۔ اے ھیالانی درشانی آئی ءَ سئے شمبے ءَ لاہور یونیورسٹی آف مینجمنٹ اینڈ سائنسز (لمز) ءَ 21 بیست ءُُ یکمی کرن ءِ اقوام ءِ متحدہ ءَ ورنا آنی کرد ءِ بن گپ ءِ سرءَ برجم داشتگیں دیوان ءَ گوں گشتانک دیان ءَ کت۔ سیکرٹری جنرل اقوام متحدہ ءَ گوشت کہ 21 بیست ءُُ یکمی کردن ءَ ورنا آنی اقوام ءِ متحدہ ءَ ارزشتی ایں کرد ءِ بیت، ورنا آنی آیوکیں باندات ءَ ارزشتی ایں کرد ءِ است انت، مرچگیں زمانگ ءَ 2نمونگی لیکہ گندگ بیت، لستیں ورنا پھم آں کہ 50سال ءَ چہ پیسر ءِ زمان شر بوتگ، لستیں پھم ایت کہ مرچیگیں زمانگ پیسریگیں زمانگ ءَ چہ گہتر انت۔ آئی ءَ گوشت کہ ورنا آناں نوکیں زمانگ ءِ ٹیکنالوجی ءَ چہ گوں ھمگام کنگ لوٹ ایت ءُُ آیوکیں باندات ءَ را دیم ءَ ایر کنان ءَ سلیبس ءِ تہ ءَ مٹ ءُُ بدلی کنگ لوٹ ایت۔ آئی ءَ گوشت کہ ایمنی ءِ واستہ پاکستان ءِ کربانی آناں اچبر بے ھیال کت نہ کناں، ایمنیں دگنیا ءِ واستہ پاکستان ءِ ازمت لائک ءِ توسیپ انت، اقوام ءِ متحدہ ءِ ”پیس کیپنگ مشنز” ءَ پاکستان جوانیں کرد ءَ پیلو کنگ ءَ انت، اقوام ءِ متحدہ ایمنیں مشنز ءَ پاکستان درستاں چہ مستریں شریکدار انت، ایمنیں مشن ءِ واستہ ازمت کنوکیں لستیں دلیریں زالبول ءُُ مردین آں گوں گند ءُُ نند سوبمندی بوتگ، اے مردم آں ایمنی ءِ برجائی ءِ واستہ کار کتگ، شمے کربانی ءُُ ازمت کنگ ءِ درگت ءَ شگر ءُُ منت وار آں۔
