اسلام آباد۔ 17 فروری(اے پی پی) وزیراعظم عمران خان پارینے کہ بے کچ مشکل زرگزرانی حالیت آتیان پد ہم پاکستان اوغانستان باہوٹ آتا میزبانی ءِ کرینے، نن تینا غٹ تر مشکل آتیان پد ہم باہوٹ آتا میزبانی ءِ برجاتخان، اوغانستان نا الس سال آتا خانہ جنگی آن پد داسہ امن و شونہالی نا حقدار ءُ، اوغانستان اٹی خانہ جنگی نا چٹفنگ نئے بیرہ پاکستان نا فائدہ ٹی ءِ بلکن داڑآن ڈیہہ ٹی امن و ایمنی نا حالیت آتے گچین کننگ تون اوار اوار مچ آ دنیا ٹی امن و سلامتی ءِ مون آ دننگ اٹ ہم کمک رسینگک، دیکی دنیا ٹی اسلاموفوبیا مسلمان باہوٹ آتا ویل آتے ٹی بھاز ودکی کرے، مقبوضہ کشمیر اٹی مودی نا انتہاپسند سوچ 80 لکھ کشمیری تے کیہی تُو آن گھیڑ اٹی ہلکونے، ہراڑآ اقوام متحدہ تون اوار جہانی برادری بایدے تینا کڑد ءِ ادا کے، بھارت نا مودی حکومت نازی فلسفہ ءِ مون آ دننگ ءِ، اقوام متحدہ بھارت نا حالیت آتا نوٹس ءِ ہلتو تو جہانی امن ءِ بھاز گڑتی مون تروک مننگ کیک۔ داخیال آتا درشانی ءِ او دوشنبے نادے آ پاکستان اٹی 40 سال آن رہینگوک اوغان باہوٹ آتا بابت آن جہانی کانفرنس آن تران کرسا کرے۔ داوخت آ اقوام متحدہ نا سیکرٹری جنرل انتونیو گوتریس، باہوٹ آتے کن اقوام متحدہ نا ہائی کمشنر فلپو گرینڈی تون اوار اہم ملکی و جہانی شخصیت آک ساڑی ئسر۔ اوپارے کہ پاکستان نا زرگزرانی حالیت آک گچین مفننگ نا سوب آن الس کن بھاز مشکل حالیت مسنے و پاکستان تینا غٹ تر مشکل آتیان پد ہم اوغانستان باہوٹ آتا میزبانی ءِ برجاتخا۔ اوپارے کہ اوغان باہوٹ آتا چناک پاکستان اٹی اڈ کننگ نا وخت آ کرکٹ ہیل کریر و اینو اوغانستان نا کرکٹ ٹیم جہانی درجہ بندی ٹی اوار مسنے، ہرا تدوک آ دے تیٹی پاکستان نا انڈر 19 کرکٹ ٹیم ءِ شکست ہم تسنو۔ اوپارے کہ ہراتم خواجہ ﷺ مکہ آن مدینہ غا ہجرت کرے تو انصار نا جوزہ مثالی ئس۔ اوباہوٹ آتاہروڑنا کمک و کمکاری ءِ کرے۔ وزیراعظم پارے کہ اللہ پاک قرآن مجید نا ذریعہ ننے انسانیت آ رحکم نا درس ایتک، و اسلام اٹی بیرہ مسلمان تا حق انا شرف نا درس ہی تفننگک بلکن انسانیت نا ہم شرف و احترام ءِ بے کچ مقدم پاننگانے۔ اوپارے کہ نائن الیون آن پد دیکی دنیا ٹی اسلامو فوبیا مسلمان باہوٹ آتا ویل آتے ٹی بھاز ودکی کرے و دیکی ٹی رنگ انا بنداو آ خلقت ءِ خلنگاکہ و لٹ تننگاکہ۔ وزیراعظم عمران خان پارے کہ اسہ ارب آن زیات آبادی والا بھارت اٹی ہم انتہاپسند سوچ انا غلبہ مسنے، مودی حکومت 2پوسکن ءُ کانود درستی راستی کرفینے ہراڑآن 20 کروڑ بھارتی مسلمان تتون اوار ایلو اقلیت آتا بنداوی حق آک بھاز بے وڑ زہمی مسنو۔ اوپارے کہ مقبوضہ کشمیر اٹی مودی نا انتہاپسند سوچ 80 لکھ کشمیری تے کیہی تُوآن گھیڑاٹی ہلکونے ہراڑآ اقوام متحدہ تون اوار جہانی برادری بایدے تینا کڑ د ءِ ادا کے تانکہ حق خودارادیت نا پرامن جہد اٹی اختہ کودک کشمیری تیا برجا بھارتی ظلم ءِ چٹفنگ تون اوار اوار اقوام متحدہ نا قرارداد آتا رداٹ کشمیری تے اوفتا حق ارادیت فراوان کننگ مرے۔ اوپارے کہ اوغانستان اٹی پرامن ایسری کن پاکستان اٹی حکومت و غٹ ادارہ غاک اسہ پنہ غاٹو و مچ آ پاکستانی قوم و غٹ ادارہ غاک اوغانستان اٹی پائیدارامن نا خواہندار ءُ۔ وزیراعظم پارے کہ اوغان الس سال آتا خانہ جنگی آن پد داسہ امن و شونہالی نا حقدار ءُ، اوغانستان اٹی خانہ جنگی نا چٹفنگ نئے بیرہ پاکستان نا فائدہ ٹی ءِ بلکن داڑآن ڈیہہ ٹی امن و ایمنی نا حالیت آتے گچین کننگ تون اوار اوار مچ آ دنیا ٹی امن و سلامتی نا مون آ دننگ اٹی ہم کمک رسینگک۔ اوپارے کہ ہراتم اوغانستان اٹی امن مریک تو علاقائی واپار ءِ مون آ دننگ رسینگک ہراڑآن ڈیہہ نا غٹ ملک آک فائدہ ہرفرہ۔ وزیراعظم عمران خان بھارت نا ساڑی حالیت آ گڑتی نا درشانی ءِ کرسا پارے کہ ساڑی آ بھارت گاندھی و نہرونا ملک سلتنے بلکن ہموڑے مودی نا حکومت نازی فلسفہ ءِ مون آ دننگ ءِ۔ اوپارے کہ اگہ جہانی برادری و اقوام متحدہ بھارت نا حالیت و گام گیج آتا نوٹس ءِ ہلتو تو داڑآن جہانی امنءِ گڑتی مون تروک مننگ کیک۔ اوپارے کہ پاکستان مدام جھیڑہ غاتا پرامن ایسری نا گرج آ زور شاغا نے و تین پہ تینی ویل آتے مذاکرات نا کمک اٹ ایسر کننگ نا خواہش مند مسنے ولے بھارتی وزیراعظم و آرمی چیف نا کنڈآن انتہاپسندانہ خیال آتا درشانی ہچ ءُ حالیت اسے ٹی زموار افس۔ اوپارے کہ داکان مست کہ حالیت آک بے کچ سنگین مریر جہانی برادری بھارتی پالیسی تا نوٹس ءِ ہلسا تینا کڑد ءِ ادا کے تانکہ انتہاپسندی ءِ چٹفنگ مرے ہرا امن و ایمنی ءِ پک کننگ کن المیءِ۔
