وزیر خارجہ شاہ محمود قریشی نا اوغان باہوٹ آتا بابت آن اڈ ہلوک آ جہانی کانفرنس آن تران

اسلام آباد۔ 17 فروری (اے پی پی) وزیر خارجہ شاہ محمود قریشی پارینے کہ پاکستان 40 سال آن 30 لکھ اوغان باہوٹ آتا میزبانی ءِ کننگ ءِ، پاکستان و اوغانستان نا تعلق اسیجا مذہب، دودوربیدہ و قدر آتیا ٹی ءِ، اوغان باہوٹ آتے داسال جہانی کانفرنس آن بھاز انگا اومیت آک وابستہ ءُ، اوغان باہوٹ آتے وطن آ پدی ہِننگ و اوغان راج اٹی جہانی کمکاری نا سخت گرج ءِ۔ داخیال آتا درشانی ءِ او دوشنبے نادے آ پاکستان اٹی 40 سال آن رہینگوک اوغان باہوٹ آتا بابت آن اڈ ہلوک آ جہانی کانفرنس آن تران کرسا کرے۔ داوخت آ وزیراعظم عمران خان، اقوام متحدہ نا سیکرٹری جنرل انتونیوگوتریس و باہوٹ آتے کن اقوام متحدہ نا ہائی کمشنر فلپو گرینڈی تون اوار اہم ملکی و جہانی شخصیت آک ساڑی ئسر۔ اوپارے کہ پاکستان 40 سال آن 30لکھ رجسٹرڈ و غیر رجسٹرڈ اوغان باہوٹ آتا میزبانی ءِ کننگ ءِ، اوغان باہوٹ آتا جہانی کانفرنس آن بھاز انگا اومیت آک وابستہ ءُ، اوغان باہوٹ آتا وطن آ پدی ہِننگ و اوغان راج اٹی جہانی کمکاری نا سخت گرج ءِ، پاکستان لکھ آ اوغان باہوٹ آتے جان جوڑی تعلیم و فنی تربیت نا آسراتی فراوان کرسا بسنے، 10 لکھ بے رجسٹرڈ اوغان باہوٹ آتے رجسٹرڈ کننگانے۔ اوپارے کہ باہوٹ آتا وطن آ پدی ہِننگ کن اوغانستان اٹی پائیدار امن بنداوی شڑت ءِ و اوغان باہوٹ آتا شرف اٹ پدی ہِننگ کن غٹ شریدارآک بایدے تینا کڑد ءِ ادا کیر۔