اقوام متحدہ نا ہائی کمشنر فلپو گرانڈی نا جہانی کانفرنس آن تران

اسلام آباد۔ 17 فروری (اے پی پی) اقوام متحدہ نا ہائی کمشنر فلپو گرانڈی پارینے کہ 40 سال آن پاکستان تینا ہمسایہ ملک اوغانستان تون استقامت اتون سلیسونے، پاکستان و ایران بے کچ مشکل حالیت آتے ٹی لکھ آ اوغان باہوٹ آتے جاگہ تسر، میزبان ملک آتا حکومت و الس نا قربانی تا ستاءِ کینہ۔ اوغانستان اٹی داسہ ہم خانہ جنگی پورو چٹتنے۔ داخیال آتا درشانی ءِ او دوشنبے نادے آ پاکستان اٹی 40 سال آن رہینگوک اوغان باہوٹ آتا بابت آن اڈ ہلوک آ جہانی کانفرنس آن تران کرسا کرے۔ داوخت آ وزیراعظم عمران خان، اقوام متحدہ نا سیکرٹری جنر ل انتونیوگوتریس تون اوار اہم ملکی و جہانی شخصیت آک ہم ساڑی ئسر۔ اوپارے کہ 40 سال آن پاکستان تینا ہمسایہ ملک اوغانستان تون سوگوی اٹ سلیسونے۔ پاکستان و ایران بے کچ مشکل حالیت آتے ٹی لکھ آ اوغان باہوٹ آتے جاگہ تسر و جہانی کہول آ رجسٹرڈ اوغان باہوٹ آتا 90 درسد نا بریبر دا ملک آتے ٹی رہینگ انگ ءُ۔ پاکستان و ایران باہوٹ آتا تعلیم، جان جوڑی و مالیات نا بشخ اسکان رسینگ آن بیدس ایلو آسراتی تے ہم پک کننگ ءُ تانکہ او ملکی زرگزران اٹی تیناکڑد ءِ ادا کننگ کیر۔ اوپارے کہ میزبان ملک آتا حکومت و الس نا قربانی تا ستاءِ کینہ۔ اوپارے کہ اوغانستان اٹی داسہ ہم خانہ جنگی پورو وڑاٹ چٹتنے۔ اوپارے کہ ننے باہوٹ آتا وطن آ پدی ہِننگ نا پائیدار ایسر اس پٹوئی ءِ و دا بابت آن غٹ شریدار آتے تینا کڑد ءِ ادا کروئی مریک تانکہ باہوٹ آتا عزت اٹ پدی ہِننگ ءِ پک کننگ مرے۔ اوپارے کہ پاکستان نا اوغان باہوٹ آتے کن بینک اکاؤنٹ ملفنگ نا موکل تننگ نا ستاءِ کینہ