اسلام آباد۔ 17 فروری (اے پی پی) چیئرمین سینیٹ محمد صادق سنجرانی ڈل اتون اوار 19 آن 21 فروری اسکان بحرین نا سرکاری دورہ ءِ کیک ہرانا سلہ ءِ بحرین نا شوریٰ کونسل نا سروک خلکونے۔ سینیٹ سیکرٹریٹ نا رداٹ چیئرمین سینیٹ نا کم و ود 14تُو آن پد ملک اسے آ دا اولیکو سرکاری دورہ مریک۔ چیئرمین سینیٹ تدوک آ اسہ سال آن زیات وخت اٹی اسہ وار اس ہم درملکی دورہ کتنے۔ چیئرمین سینیٹ نا تینٹ اختیار کروک بچت گام گیج آتارداٹ پیشن نا ملک دورہ غاتے کم کننگانے۔ چیئرمین سینیٹ آخیریکو وار 18 آن 22 دسمبر 2018ء آ سعودی عرب نا دورہ غا ہناسس۔ دا بحرین نا دورہ ءِ کننگ نا مسخت پارلیمانی کمکاری ءِ مون آ دننگ و تین پہ تینی رابطہ غاتے مون آ دننگ ناءِ۔ چیئرمین سینیٹ پارے کہ اونا دورہ غاتیا ہنپننگ نا مسخت قومی خزانہ غا بھاریم ءِ کم کننگ ءِ۔ دادورہ نا سلہ ءِ بحرین نا شوریٰ کونسل نا چیئرمین خلکونے و داٹی سینیٹ آ بھاریم تمپک۔ بحرین دورہ ٹی سینیٹر ز عابدہ عظیم، کلثوم پروین، منظورکاکڑ، حافظ عبدالکریم، کیشوبائی، مرزا محمد آفریدی و فدامحمد اوار مریرہ۔
