کوءٹہ ۔ 14 فروری (اے پی پی) چیف سیکرٹری بلوچستان کیپٹن ریٹائرڈ فضیل اصغر پارینے کہ صوبائی حکومت ضرورت نا گڑاتا نہاد آتیا سخت نظر تخنگ کن مچ آ صوبہ ٹی ضلعی پرائس کنٹرول کمیٹی تے پین فعال کننگ نا فیصلہ کرینے انتئے کہ الس ءِ کٹیا کروک و کوڑی کروک آتا رحم و کرم آ ہلپنہ، داخیال آتا درشانیءِ او پرائس کنٹرول و ملاٹ کروک گڑاتا بہا کننگ نا چرجوئی ٹی بڑزکو کہولی دیوان آن تران کرسا کرے ۔ دیوان اٹی ایڈیشنل چیف سیکرٹری داخلہ حافظ عبدالباسط، صالح محمد ناصر، سیکرٹری انڈسٹریز تون اوار ایلو کمامدارآک بشخ ہلکر ۔ دیوان اٹی پرائس کنٹرول میکنزم ، خولم نا ہلنگ تون اوار ایلو باندات آتا جاچ ءِ ہلنگا چیف سیکرٹری پارے کہ صوبائی حکومت الس ءِ ریلیف فراوان کننگ کن ہر حد اسکان کاہک و داڑکن گام گیج کننگ انگ ءِ ، اوپارے کہ ضرورت نا گڑاتا نہاد آتے ٹی ودکی ءِ اسُل سگپنہ وخت اس کہ نہاد آتے ٹی سوگوی اتنگ کن گام گیج کننگ انگ ءِ ، اوپارے کہ مارکیٹ اٹی کنوئی آ گڑاتیان ہلیس لس کاریم اٹ اتوک آ گڑاتا نمونہ ءِ جمع کرسا لیبارٹری آ گدریفنگے تانکہ اوفتا جوانی اٹ چیکنگ ءِ کننگے و ملاوٹ کروک گڑاتا بہا کروک آتا برخلاف کریک ڈاءون کننگے ۔ اودیوان اٹی بشخ ہلوک آتے پارت کرے کہ صوبہ نا ہر ضلع ٹی الس ءِ آسراتی فراوان کننگ کن اڑزان بازار تا اڈتننگ ءِ پک کننگے ۔ اوپارت کرے کہ پرائس کنٹرول و ملاوٹ کروک آ گڑاتا بہاکننگ نا بابت آگاہی سیمینار اس اڈتننگے ہراٹی ایسوسی ایشنز، راجی کارندہ و السی نمائندہ غاتے اوار کننگے انتئے کہ ضرورت نا گڑاتا نہاد آتے ٹی سوگوی اتنگ بنجائی حکومت نا اولیت ءِ ، چیف سیکرٹری پارے کہ دوشنبے اسکان ہر حال اٹ خولم ہلنگ ءِ پک کننگے و داچرجوئی ٹی ڈیوالائی ءِ سگپنہ ۔
