ترک صدر نا دورہ پاکستان ہڑتوم آ کنڈآتا زرگزرانی و اقتصادی و واپاری و دودوربیدہ رابطہ غاتے پوسکن آ بڑزی تسکان دننگ نا سوب مریک، وزیراعظم نا خصوصی کمکار ڈاکٹر فردوس عاشق اعوان نا ٹویٹ

اسلام آباد ۔ 14 فروری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ پاکستان و ترکی بے مثل سنگتی نا بندھن اٹ تفوک ءُ، مذہب و دودوربیدہ غا مبنی دا رشتہ ہڑتوم آ ملک آتا الس نا است اتون گنڈوک ءِ، ترک صدر رجب طیب اردوان و وزیراعظم عمران خان نا کماشی ٹی ہڑتوم آ ملک آتا ہڑتوم آ کنڈآتا تعلقداری پوسکن آ بڑزی تیا سرمننگ ءُ ۔ جمعہ نادے آ تینا ٹویٹ اٹی ڈاکٹر فردوس عاشق اعوان پارے کہ ترک صدر نا پاکستان نا پارلیمان نا اسیجا دیوان آن چارمیکو وار تران ہڑتوم آ ملک آتا نیام اٹ لازوال سنگتی نا درشانی ءِ، پاک ترک سٹریٹجک شریداری نا بابت بڑزکو کہولی سلابت نا شش می دیوان ہڑتوم آ ملک آتے ٹی پین خڑکی نا سوب ءِ ۔ اوپارے کہ اقوام متحدہ نا جنرل اسمبلی ٹی کشمیر ناویل آ ننا موقف نا پبی تائید و مخ تفی نا سوب پاکستان نا الس نا است اٹی ترک سرکڑدہ و الس کن خصوصی شرف ءِ ۔ اوپارے کہ مقبوضہ جموں و کشمیر آ ترکی نا اصولی موقف آ اونا منت واری ءِ ہرفنہ، ترک صدر نا دورہ ہڑتوم آ زرگزرانی و اقتصادی ، واپاری و دودوربیدہ رابطہ غاتے پوسکن آ بڑزی تیا دننگ نا سوب مریک ، واپاری و کاروباری کمکاری نا پوسکن ءُ کسر ملنگک ۔