اسپیکر قومی اسمبلی اسد قیصر نا ترک صدر نا پارلیمنٹ نا اسیجا دیوان آن تران نا وخت آ خطبہ استقبالیہ

اسلام آباد ۔ 14 فروری (اے پی پی) اسپیکر قومی اسمبلی اسد قیصر ترک صدر رجب طیب اردوان نا پارلیمنٹ اٹی پاکستان نا الس و گچین مروک آ نمائندہ غاتا کنڈآن خیرمقدم ءِ کرسا اسیجا دیوان آن اونا تران ءِ تاریخی ءُ موقع اس گوندسا پارینے کہ ترک صدر مرد مجاہد آنبار بے کچ نرزوری اٹ کشمیری تا ترجمانی ءِ کرینے ہراڑآ دا ایوان، کشمیریک و پاکستانیک نے و نا قوم ءِ سلام پیش کیرہ ۔ جمعہ نادے آ پارلیمنٹ نا اسیجا دیوان نا وخت آ تینا خطبہ بیابخیری ٹی پارے کہ اوڑکن دا بے کچ شرف نا ہند اسے کہ او دا شرفمند آ ایوان ءِ اسہ ہندن ءُ تاریخ ساز شخصیت اس درستی راستی کرفنگ ءِ ہرا نئے بیرہ پاکستانی تا سچا سنگت و قابل پت ایلم ءِ بلکن ساڑی آ اسلامی دنیا نا حقی راہشون و دانشور ءِ ۔ اوپارے کہ 22 کروڑ غیور و پرعزم پاکستانی تا دا گچین مروک و نمائندہ ایوان ترک صدر ءِ است انا حب اٹ بخیر اٹ پاہک، دا ایوان ءِ مستین اٹی ہم ترک صدر نا خیال آتے بِننگ نا شرف دوئی مسنے و نن اینو ہم چاری اُن کہ بدلینگوک آ جہانی منظر نامہ ٹی اہل اسلام نا نرزور و باوقار فرزند نا افکار آن فائدہ ہرفر ۔ اوپارے کہ طیب اردوان ہمو عظیم ترک قوم انا نمائندہ ءِ ہراڑتون مسلمانان برصغیر نا جوزہ ئی وابستگی ہڑتوم آ مملکت آتا جوڑ مننگ آن مست انا داستان ءِ ، ننا باوہ و پیرہ اولیکو جنگ عظیم آن پد ترکی نا فائدہ غاتیا بروک آ زد انا برخلاف تحریک خلافت نا بیرک نا کیرغ آن یکجا مسر و ترک آتا دفاع ءِ تینا نصب العین کریر ۔ اوپارے کہ حقیقت اٹ ہندا تحریک خلافت تحریک پاکستان نا نقطہ آغاز ئس انتئے کہ قومی اہمیت و وقار نا درس برصغیر نا مسلمان تے ہندا ہمو تحریک خلافت آن ملا ہرا بالاخر پاکستان نا جوڑ مننگ نا دروشم اٹ دنیا نا مون آ آشکار مس ۔ اسپیکر پارے کہ ای دا پاو تو غلط مفروئے کہ پاکستانی تا است ترک قوم اتون دھڑکک، ننا تاریخ مشترک ءِ ، ننا مذہب اسٹ ءِ و ننا دودوربیدہ و تہذیبی رشتہ ءِ ۔ اوپارے کہ ترک صدر نا ساڑی دورہ پاکستان اسہ ہندن ءُ وخت اسے ٹی مننگ ءِ ہرا تم دنیا ٹی جنگ و بدامنی نا جمر ہرکنڈآ تالان ءِ و جہانی دہشت گردی مسلم آبادی ءِ اسلاموفوبیا کون آ حقارت آمیز مذہبی خار اتون ہم مون تروک ءِ ۔ اسپیکر پارے کہ نی جوانی اٹ بلد اُس کہ تدوک آ سال اگست اٹی بھارت ہراوڑ تینٹ تینا آئین ءِ لتاڑسا کشمیر ءِ تینا پوسکن آ آبادی ٹی بدل کرے، مہذب دنیا ٹی اونا مٹ ملیپک ۔ مودی سرکار نا دا ظالمانہ گام گیج انا سوب آن نئے بیرہ داکہ مظلوم کشمیری تے ہروڑنا حق آتیان محروم کننگا بلکن کشمیر اسہ پوسکن ءُ جہانی ریکارڈ اس ہم جوڑ کرے کہ تدوک آ شش تُو آن دا ڈیہہ ٹی پدریسہ کرفیو خلوک ءِ ۔ اوپارے کہ دا حالیت آتے ٹی ہرا مرد مجاہد بے کچ نرزوری وبے باکی اٹ کشمیری تا ترجمانی ءِ کرے اونی اُس ۔ دا ویل آ نا دوٹوک موقف آ دا ایوان ، کشمیریک و پاکستانیک نے و نا قوم ءِ سلام پیش کیرہ ۔