ترک صدر رجب طیب اردوان نا پارلیمنٹ نا اسیجا دیوان آن تران

اسلام آباد ۔ 14 فروری (اے پی پی) ترک صدر رجب طیب اردوان پارینے کہ پاکستان نا ڈکھ ننا ڈکھ، پاکستان نا خوشی ننا خوشی ءِ، ترکی کشمیر نا ویل انا پرامن و ہیت وگپ انا کمک اٹ ایسری نا موقف آ سلک، کشمیر نا ویل انا ایسرطاقت یا جبری پالیسی تے اٹ آخا بلکن انصاف و راستکی تا اصول آتے اٹ مننگ کیک، پاکستان تون ازل آن جاری ننا برادرانہ تعلقداری تا ابد برجاسلک، انسداد دہشت گردی ٹی نن پاکستان تون کمکاری ءِ آخبت اٹ ہم برجاتخنہ، سیم و فاصلہ غاک مسلمان تا است آتا نیام اٹ دیوال اس جوڑ مننگ کپسہ، مچ آ دنیا نا مسلم ایلم تا ڈکھ دڑد اٹی شریک مننگ و اوفتیا مروک آ ظلم انا برخلاف اوفتے تون تفنگ ننا غٹ انا فرض ءِ ، ننا ایمان ءِ کہ ظلم انا مقابلہ ءِ کپننگ ظلم کننگ آنبار ءِ، مسلم امہ دہشت گردی ، جنگ، مذہب پرستی ، مفلسی و نیزگاری نا بھاریم نا کیرغ آن ڈبینگوک ءُ ، پاکستان شونداری و شونہالی نا سفر نا کنڈآرواں دواں ءِ، اقتصادی شونداری نا عمل دے تیٹی بفک ۔ جمعہ نادے آ پارلیمنٹ نا اسیجا دیوان آن تران کرسا ترک صدر رجب طیب اردوان پارے کہ ای پاکستان نا الس نا شرفمند آ نمائندہ غاتا ساڑی گری نا توسط اٹ تینا غٹ ایڑھ و ایلم تے بھاز عزت و شرف اٹ سلام محبت پیش کیوہ، پاکستان نا سرکاری دورہ نا وخت آ شرفمند آ باسک آتون مخاطب مننگ کنکن بھلو خوشی اسے نا سوبءِ، اینو ننے دا عظیم الشان چاگڑد اٹی ننا است آتے یکجا کننگ نا موقع اس فراوان کننگ آ ای اللہ تعالیٰ نا شکر گزار اُٹ و حمد و ثناء پیش کیوہ ۔ دا اسیجا دیوان اٹی کنے تران کننگ نا موقع تننگ آ ای نما غٹ انا جتا جتا حیثیت اٹ ہم منت واری ءِ ہرفیوہ ۔ ای تینا تران نا بناءِ غٹ آن مست نمے غٹ ءِ ترکی نا 8 کروڑ 30 لکھ ایڑھ ایلم، ترکی نا گرینڈ نیشنل اسمبلی ٹی الس نا نمائندہ پارلیمنٹ نا باسک آتا ہم سلام ءِ پیش کننگ خواوہ ۔ اوپارے کہ کنا اسلام آباد اٹی گامءِ تخنگ تون ہراوڑاٹ پاکستان نا الس جم و جوش و مہر ومریبت اٹ ننے بخیر کریر، ای اوڑآ پاکستانی قوم و پاکستان نا بڑزکو کمامدارآتا خلوص و مہمان نوازی آ نماغٹ انا است انا حب اٹ منت وار اُٹ ۔ نن داڑے پاکستان اٹی وخت اس ہم تینے اجنبی محسوس کپنہ، براعظم ایشیاء نا اہم ہند آتیان اسٹ ای و عالم اسلام نا دا جغرافیائی ڈیہہ ٹی تینے تینا اُراٹی محسوس کینہ ۔ ترکی وپاکستان کون آ برادرانہ تعلقداری دنیا ٹی شاید ایلو ملک یا قوم تیٹی خننگے، اینو پاکستان و ترکی نا تعلقداری ہراغٹ اکن قابل رشک ءُ، دراصل تاریخی واقعہ غاتے ٹی سوگو و پائیدار مسنو و دادے حقی برادرانہ تعلقداری تا دروشم تننگانے ۔ اوپارے کہ سلطنت غزنیہ نا بانی محمود غزنوی نا دور آن ترک دا وسیع جغرافیہ نا اسہ بشخ اس جوڑ مسنے ۔ سلطنت مغلیہ نا بانی ترکی النسل ظہیر الدین بابر و ایلو مغل حکمرانک ساڑی آ پاکستان تون اوار غٹ ڈیہہ غا کم و ود 350 سال حکومت کریر و ننا اسیجا تاریخ پرانمنٹ نقش اس ہلا ۔ دافتیان ظہیر الدین بابر نا جوڑ کروک مغلیہ سلطنت و غزنوی تا سلطنت نا ستارہ چمک تننگ ءِ ۔ اوپارے کہ اردو ادب نا عظیم شاعر مرزا اسد اللہ خان غالب، تحریک خلافت نا روح رواں جوہر برادران ، بلقانی جنگ آتا وخت آ سلطنت عثمانیہ نا فوجی دستہ غاتا کمک ءِ کننگ کن بروک آ عبدالرحمان پشاوری کون آ ہستیک ننا اسیجا تاریخ اٹی جوان انگا بشخ آتے ٹی نوشتہ مروک آ ہستی تیان منٹ اسٹ ءُ ۔ ترکی و پاکستان نا تعلقداری شاعر اعظم محمد اقبال و قائد اعظم محمد علی جناح نا نہادی میرات آتانتیجہ ٹی ساڑی آ دور اسکان سرمسنو ۔ اوپارے کہ 1915ء ٹی ہراتم ترک فوج اسہ زبردست مزاحمت اتون آبنائے چناق قلعہ نا دفاع کریرہ تو ہمووخت محاذ آن 6ہزار کلو میٹر مر دا گل زمین آ مروک آ مچی و ریلیک ننا تاریخ نا ناقابل فراموش پنہ غاتیا درج مسنو ۔ اوپارے کہ لاہور شار اٹی مروک آ دا تاریخی جلسہ غاتا مرکز نگاہ چناق قلعہ ئس ۔ دا جلسہ غاتا بست و بند ءِ کروک آ منتظٰم آک دراصل چناق قلعہ ٹی برسرپیکار ترک فوجی و ترک قوم انا امداد نا مسخت کن مسوسس ۔ اوپارے کہ دادے آ مسلمانک مچ آ لاہور و سڑک و گلی تیٹی پیش تماسر ۔ رجب طیب اردوان پارے کہ ہراتم نن زند و مرک انا کشمکش اٹی اختہ ئسن تو دا جغرافیہ ٹی ننا ایڑھ و ایلمک دادور انا نوآبادیات نا ظلم و ستم نا گواچی ئسر ۔ غٹ تر فریشانی و خطرہ غاتیان پد ہم میدان، گلی و سڑک آتے ٹی مروک آ نمائش آتے ٹی چناق قلعہ کن امداد جمع کننگاکہ ۔ اوپارے کہ بزنس و زرکاری نا چاگڑد اٹی گچینی اتنگ ءِ اساس کروک آ گام گیج پاکستان ءِ زرکار آتے کن کیہی زیات جاذب نظر جوڑ کننگ ءِ ای ترکی نا چندی بشخ آتیان تعلق تخوک آ بزنس مین تا اسہ بھلو پڑک اسے تون داڑے بسونٹ ۔ ترکی پاکستان اسیجا ورکنگ پڑک دیوان اٹی زرکار آتون اوڑدہی مریک ۔ اوپارے کہ نن اسہ وار ولدا پاکستان نا درخشاں آخبت و زرگزران آ تینا پت انا تائید ءِ کینہ ۔ اوپارے کہ وزیراعظم پاکستان نا دورہ ترکی ٹی تین پہ تینی رابطہ غاتے پین سوگوی تننگ نا باندات اٹی مطابقت قائم مسوسس و نن تعلقدار کمامدارآتے پارت جاری کریسن ۔ اوپارے کہ دورہ ٹی طے مروک آ اسہ اسٹریٹجک اقتصادی فریم ورک نا متن، واپار آن ہلیس بنداوی پنجر اسکان زرکاری آن ہلیس سیل و سوات اسکان نا چندی باندات آتے ٹی ننکن اسہ روڈ میپ اس مریک ۔ ہڑتوم آ ملک آتا نیام اٹ 2009ء ٹی امن اٹی بروک آ بڑزکو کہول انا تزویراتی کمکاری کونسل نا شش ممی دیوان ہم اڈ ہلنگ ءِ ۔ پاکستان نا 21کروڑ و ترکی نا 8کروڑ 30 لکھ الس شانہ بشانہ کاریم کرسا تین پہ تینی اقتصادی تعلقداری ءِ حق بجانب کہول اسکان سرکیرہ ۔ اوپارے کہ نن پاکستان نا دہشت گردی نا برخلاف جہد ءِ خراج تحسین پیش کینہ، پاکستان ڈیہہ ٹی نزوری نا چاگڑد، دہشت گردی و جھیڑہ غاتیان بھاز بے وڑ زہمی مروک آ اسہ ملک اسے ۔ نن 35سال آن جتائی پسند دہشت گرد تنظیم نا برخلاف مون تننگ اُن ۔ داعش، پی کے کے و فیتوآنبار دنیا نا وحشی ترین تنظیم تا ہدف اٹی مروک آ اسہ مملک اسے نا وڑاٹ نن پاکستان ءِ مون تروک مشکلات آتیان جوانی اٹ بلد اُن ۔ انسداد دہشت گردی نا باندات آتے ٹی نن پاکستان تون کمک ءِ آخبت اٹی ہم برجاتخنہ ۔ اوپارے کہ ای داڑے بھلو وثوق اسے اٹ پاننگ خواوہ کہ اوغان امن عمل اٹی پاکستان نا مثبت خذمت ستاکڑزک ۔ ترکی دا چرجوئی ٹی تینا ہڑتوم آ برادر ملک پاکستان و اوغانستان تون ہروڑنا کمک کننگ ءِ ۔ اوپارے کہ او تینا تقریر ءِ پنی آ شاعر ابوالاثر حفیظ جالندھری نا دا اشعار تیان کیوہ ۔

پاک سرزمین شاد باد

کشور حسیں شاد باد

تو نشان عزم عالی شان

ارض پاکستان

مرکز یقین شاد باد