اسلام آباد ۔ 13 فروری (اے پی پی ) وزیراعظم عمران خان کنوئی آ گڑاتے ٹی ملاوٹ نا سختی اٹ نوٹس ءِ ہلسا ملاوٹ نا برخلاف ایمرجنسی نافذ کرسا نیشنل ایکشن پلان ءِ اسہ ہفتہ ٹی مرتب کننگ نا پارت کرے و پارے کہ کنوئی آ گڑاتے ٹی ملاوٹ کروک آ ک ننا الس و خاص وڑاٹ ننا چناتا جان جوڑی و زند اتون گوازی کننگ ءُ ہرانا ہچ ءُ حالیت اسے ٹی موکل تفنہ، اوپارت کرے کہ ملک اٹی ضرورت نا گڑا مثلا خولم، بورہ، و ایلو فصل آتا طلب و رسد نا تخمینہ و طلب ور سد ءِ پک کننگ نا بابت جامع ڈٹ بندی اسے نا غرض اٹ جوڑ کروک آ خصوصی سیل انا قیام نا عمل ءِ ترند کننگے ۔ داخیال آتا درشانی ءِ او مچ آ ملک اٹی کنوئی آگڑاتا نہاد آتا جاچ ، پرائس کنٹرول ، کوڑی کننگ، ناروا کٹیا کننگ وملاوٹ نا توننگ نا بابت بڑزکو کہولی دیوان اٹی کرے ہرا وزیراعظم عمران خان نا کماشی ٹی پنچ شنبے نادے آ اڈ ہلک ۔ دیوان اٹی وزیر ڈٹ بندی اسد عمر، وزیر نیشنل فوڈ سیکورٹی مخدوم خسرو بختیار ، سلاہکار واپار عبدالرزاق داءود، خصوصی کمکار حوالکاری و شین کاری ڈاکٹر فردوس عاشق اعوان و تعلقدار محکمہ و وزارت آتا سینئر آفیسر آک بشخ ہلکر وخت اس کہ وزیراعلیٰ پنجاب ، وزیراعلیٰ خیبر پختونخوا ، صوبہ پنجاب ، صوبہ سندھ ، صوبہ بلوچستان ، صوبہ خیبر پختونخوا نا چیف سیکرٹری صاحب آک و ایلو صوبائی سینئر کمامدارآک ویڈیو کانفرنسنگ نا کمک اٹ دیوان اٹی بشخ ہلکر ۔ داوخت آ صوبائی چیف سیکرٹری صاحب آک وزیراعظم ءِ تینا تعلقدار صوبہ غاتے ٹی کنوئی آ گڑاتا نہاد آتا ساڑی حالیت آتا بارواٹی سرجم حوال تسر ۔ وزیراعظم ءِ پاننگاکہ صوبہ پنجاب ، صوبہ خیبر پختونخوا و بنجائی دارلحکومت اٹی جم وڑاٹ نت ، بورہ ، برنج و چندی ایلو گڑاتا نہاد آتے ٹی سوگوی مسنے و گڑاس گڑاتا نہاد آتے ٹی کمتی واقع مسنے وخت اس کہ صوبہ سندھ اٹی گڑاتا نہاد آتے ٹی ودکی نظر بسنے ۔ وزیراعظم ءِ پاننگاکہ بنجائی حکومت نا فیصلہ نا رداٹ پاسکو نا کنڈآن صوبہ سندھ ءِ چار لکھ ٹن خولم نا فراوانی کم و ود پورو مسنے وخت اس کہ اسہ لکھ ٹن پین خولم نا فراوانی نا درخواست آ اقتصادی رابطہ کمیٹی تینا دیوان اٹی سجفک ۔ وزیراعظم کراچی ٹی نت انا نہاد آتیا گڑتی نا درشانی ءِ کرسا چیف سیکرٹری سندھ ءِ پارت کرے کہ نت انا نہاد آتا مون ءِ توننگ نا بابت دمدستی گام گیج آتے پک کننگے و کوڑی کروک و ناروا کٹیا کروک آتا برخلاف انتظامی گام گیج آتے گچین کننگے ۔ دا وخت آ دیوان آن تران کرسا وزیراعظم عمران خان پارت کرے کہ ملک اٹی ضرورت نا گڑامثلا خولم، بورہ و ایلو فصل آتا طلب و رسد نا تخمینہ و طلب و رسد ءِ پک کننگ نا بابت جامع ڈٹ بندی نا غرض اٹ جوڑ کروک خصوصی سیل انا قیام نا عمل ءِ ترند کننگے ۔ اوپارت کرے کہ وزارت نیشنل فوڈ سیکورٹی نا افرادی قوت نا بابت گرج آتے پورو کننگے ۔ دیوان اٹی وزیراعظم ءِ بھلا شار تیٹی اسلام آباد نا وڑآ ضرورت نا گڑاتا آن لائن ڈیلیوری ، نہاد آتا بارواٹی معلومداری فراوان کروک آ موبائل ایپلیکشن نا جاری کننگ و بزغر آتا آسراتی کن فارم مارکیٹس نا جوڑ کننگ اٹ پیش رفت آہم سرجم حوال تننگا ۔ وزیراعظم غٹ صوبائی سیکرٹری تیان بنداوی ضرورت نا گڑامثلاپال، سی، تیل کنوئی ءُ دیر، سو، مصالحہ ، دال و ایلو گڑاتے ٹی ملاوٹ نا حالیت آتیا ہم سرجم حوال ہلک ۔ وزیراعظم کنوئی آ گڑاتے ٹی ملاوٹ نا سختی اٹ نوٹس ءِ ہلسا پال، سو ، دال کون آ ہردے نا گڑاتے ٹی ملاوٹ ءِ ہچ ءُ حالیت اسے ٹی امنا کپنہ ۔ اوچیف سیکرٹری صاحب آتے پارت کرے کہ بروک آ اسہ ہفتہ ٹی ملاوٹ نا برخلاف گچین حکمت عملی و ٹائم لائنز آ مبنی روڈ میپ اس ترتیب تننگے ہرانا بروک آ ہفتہ دیوان اٹی جاچ ءِ ہلنگک ۔ وزیراعظم صوبہ پنجاب و صوبہ خیبر پختونخوا ٹی نہاد آتا مون ءِ توننگ و کوڑی کروک و نارواکٹیا کننگ نا توننگ نا برخلاف انتظامی گام گیج آتا ستاءِ کرے ۔ وزیراعظم ءِ پاننگاکہ صوبہ بلوچستان اٹی کنوئی آگڑاتیٹی ملاوٹ چیک کننگ کن لیبارٹری غیر فعال ءِ ۔ وزیراعظم پارت کرے کہ بلوچستان اٹی فوڈ ٹیسٹنگ لیبارٹری نا فعالی ٹی بنجائی حکومت نا کنڈآن ہرممکنہ کمک فراوان کننگے ۔
