اسلام آباد ۔ 13 فروری (اے پی پی) بنجائی وزیر قومی غذائی رکھ مخدوم خسروبختیار پارینے کہ زرگزرانی و اقتصادی چارٹر وخت انا گرج ءِ ، حکومت و غٹ سیاسی جماعت آک اواری اٹ ملک ءِ اقتصادی وڑاٹ مون آ دننگ اٹ تینا کڑد ءِ ادا کیر، کشت وکشار نا شونداری ساڑی حکومت نا اولیت ءِ ، ’’کشاری شونداری کن 300 ارب روپئی نا پیکج نا پڑو ءِ کننگانے ۔ پنچ شنبے نادے آ قومی اسمبلی ٹی ملکی اقتصادی حالیت آتیا شرہ ٹی بشخ ہلسا بنجائی وزیر مخدوم خسروبختیار پارے کہ مچ آ قوم انا خنک ملکی زرگزران آ شرہ غاٹو ۔ احسن اقبال مسلم لیگ (ن) ناحکومت نا ہرا زرگزرانی پلان نا پارینے دا است آ دُوتخاکہ و سنگت آتون سلابت کریکہ تو اودے ہم باور بسکہ کہ اسحاق ڈار نا زرگزران پائیدار الوکہ ۔ 2013ء ٹی مسلم لیگ (ن) ہراتم بس آئی ایم ایف آ ہنا تو حسابات جاریہ نا نسخان دونیم ارب ڈالر ئس ۔ زرمبادلہ نا حالیت آک گچین ئسر ۔ ہراتم پیپلزپارٹی نا حکومت ئس تو وامک جی ڈی پی نا 58 درسد ئسر ۔ ہراتم ہنا تو 63 درسد ئسر ۔ ہراتم ننا حکومت بس تو وامک جی ڈی پی نا کچ آن 78 درسد ئسر ۔ شش تُو و اسہ سال اٹی ملکی زرگزران نا پنجر بدل مننگ کپک ۔ پیپلزپارٹی حکومت نا چٹنگ آن پد سرکاری ادارہ غاتا نسخان 550 ارب روپئی ئس ۔ مسلم لیگ (ن) 1300 ارب نا کچ آ ہلا ۔ داحساب وکتاب آن ہچ کس نمن مننگ کپک ۔ اوپارے کہ امپورٹ آن گروتھ بریک ولے او پائیدار الوکہ ۔ پاکستان اٹی کھپت نا شرح 94 و بھارت اٹی 80 درسد ءِ ۔ پاکستان اٹی سیونگ نا شرح دہ درسد و بھارت اٹی 20 درسد ءِ ۔ اوپارے کہ 50 لکھ بینک اکاءونٹ ہولڈرآتے ٹی پنچ لکھ خراج نیٹ اٹی ءُ ۔ نن بایدے سجفن کہ ننے خراج نا بنداو اٹی وسعت اتوئی مریک ۔ ہژدہ می ترمیم آن پد وسیلہ غاک صوبہ غاتیا ہِننگ ءُ ۔ بنجائی حکومت نا نسخان ودنگ ءِ ۔ دا چیلنج بروک آحکومت آتے ہم مروئے ۔ اوپارے کہ ننے اسہ نیشنل ڈویلپمنٹ فنانس ادارہ اس جوڑ کروئی مریک ۔ دا اسہ حکومت یا جماعت اسے نا ویل اف ۔ زرگزران کن غٹ ءِ اوار دروئی مریک ۔ آخبت اٹ آبادی نا چیلنج آتون مون تننگ کن ننے جامع پالیسی جوڑ کروئی مریک ۔ دا اسہ قومی زرگزرانی چارٹر اس درستی راستی کرفنگ نا وخت ءِ ۔ ننے توانائی نا دہ سالہ پالیسی مرتب کروئی مریک ۔ اوپارے کہ بروک آ سال اٹی ننے 27 ملین ٹن نا پیداوار درکار ءِ ۔ ساڑی حکومت 300 ارب نا پروگرام اس بناکرینے ۔ سرٹیفائیڈ بج آتے مون آدننگ اُن ۔ کرپاس نا پیدوار اٹی ودکی کن کاریم مننگ ءِ ۔ کشت وکشار اٹی دمدستی بھرم بننگ کیک ۔ داڑان دیہی زرگزران نا شونداری نا رفتار اٹی پنجا درسد ودکی مننگ کیک ۔ ہنداخاطرآن خواست ءِ کہ کشت وکشار ءِ اہمیت تننگے ۔ کشت و کشار آ دا ایوان اٹی بایدے شرہ مرے ۔
