اسلام آباد ۔ 13 فروری (اے پی پی) ڈپٹی اسپیکر قومی اسمبلی قاسم خان سوری پارینے کہ ہلال احمر پاکستان نا کنڈآن پارلیمنٹ ہاءوس نا پیشن بلڈ کیمپ اس اڈتننگ گچین ءُ گام اسے، پاکستان نا گچین مروک آ نمائندہ غاک دتر نا عطیہ تسنو، تینا حلقہ غاتے ٹی ہم دا گام ءِ مون آ دینہ ۔ داخیال آتا درشانی ءِ او پنچ شنبے نادے آ پاکستان ریڈ کریسنٹ سوساءٹی نا کنڈآن پارلیمنٹ ہاءوس نا پیشن خلوک آ بلڈ کیمپ انا بناءِ کرسا کرے ۔ داوخت آ چیئرمین ریڈ کریسنٹ سوساءٹی ابرارالحق ہم ساڑی ئسک ۔ ڈپٹی اسپیکر قاسم خان سوری پارے کہ ننا پورو کوشست ءِ روڈ ایکسیڈنٹ اٹ کمتی اتنگے و دا چرجوئی ٹی رولز آف لاء ءِ مون آ اتنگک ۔ اوپارے کہ اینو پارلیمنٹ اٹی بلڈ کیمپ اس خلسا اہم ءُ گام گیج اس کننگا، پاکستان نا گچین مروک آ نمائندہ غاک دتر نا عطیہ تسنو ، داوڑنا گام گیج آتے السی نمائندہ غاک تینا حلقہ غاتیا ہم دیر و علاقہ نا خلقت ءِ دتر نا عطیہ تننگ نا پاننگک ۔ داوخت آ چیئرمین ہلال احمر پاکستان ابرارالحق پارے کہ پاکستان اٹی ہر سال 38 ہزار خلقت روڈ ایکسیڈنٹ اٹ کہیرہ ۔ دا بندغ آک وخت آ دتر ملیپننگ آن زند آن دوتے سلرہ، ننا مسخت پارلیمنٹ آن دتر نا عطیہ جمع کننگ ئس، نن مچ آ ملک اٹی داوڑنا گام گیج آتے فعال کننگ اُن ۔ اوپارے کہ ریڈ کریسنٹ دنیا نا 192ملک آتے ٹی کاریم کننگ ءِ، پاکستان اٹی ریڈ کریسنٹ سوساءٹی ٹی پوسکن آ پالیسی ءِ مون آ اتینہ ۔ اوپارے کہ ترکی نا صدر رجب طیب اردوان نا کنڈآن ریڈ کریسنٹ کن ہم اہم ءُ کاریم اس کننگانے ۔ داوخت آ پارلیمنٹ نا باسک آتا کنڈآن دتر نا عطیہ ہم تننگا ۔
