کوءٹہ ۔ 12 فروری (اے پی پی) وزیراعلیٰ بلوچستان جام کمال خان پارینے کہ شونداری ہراڑے کہ مرے اونا فائدہ لس بندغ اسکان سرمریک ، سمنگلی فلائی اوور نا ڈٹ انا پوروی آن سمنگلی و ایب و کیب انا آبادی نا خلقت ءِ ہن و بر نا گچین آسراتی ملک ۔ داخیال آتا درشانی ءِ او سمنگلی فلائی اوور نا ڈٹ انا بنداو ءِ تخنگ نا دود آن تران کرسا کرے، صوبائی وزیر آک، اسمبلی نا باسک آک و ایئر وائس مارشل عباس ئسک ہم دود اٹی ساڑی ئسر ۔ وزیراعلیٰ پارے کہ ہن و بر نا ذریعہ ءِ مون آ دننگ آن شونداری نا پوسکن ءُ کسر ملنگک، داوخت آ صوبہ نا شونداری گرج آتون اوار اوار سیکورٹی نا خواست آتا رداٹ ہم گوادر آن کوہلو اسکان سڑک آتا تفنگ نا ڈٹ آتیا عملدرآمد برجاءِ ہرافتا پوروی آن شونداری نا اسہ پوسکن ءُ دور اس بناکیک، اوپارے کہ بلوچستان نا شونداری و امن ہڑتوم آک اہم ءُ ہنداخاطرآن ہراڑے سیکورٹی مسخت آتے کن شونداری ڈٹ آتے ٹی صوبائی حکومت نا کمک درکار مریک نن پورو کمک کینہ، وزیراعلیٰ پارے کہ امن و ایمنی نا حالیت آتا گچینی آن شونداری نا عمل اٹی ہم ترندی بسنے و اینو صوبہ نا اسہ ہم علاقہ اس ہندن ءُ اف ہراڑے سیکورٹی یا پین سوب اسے آن شونداری عمل اٹ اڑاند ودی مرو، وزیراعلیٰ پارے کہ سمنگلی ایئر بیس ملک انا چاگڑدی سیم تا دفاع تون اوار اوار تینا جتا انگا محل و وقوع و پرکشش ندارہ غاتا سوب ہم اہمیت تخک و خاص وڑاٹ بلوچستان نا مخلوق ءِ سمنگلی ایئر بیس تون خاص انسیت ءِ ، اوپارے کہ یقینا مچ آ ملک آن تعلق تخوک آ ایئر فورس انا آفیسر و کارندہ غاک ہم سمنگلی ایئر بیس آن پدی ہنسا کوءٹہ ٹی تینا تعیناتی نا وخت ءِ یات تخور، داکان مست بیس کمانڈر ایئر کموڈور زبیر احمد خطبہ استقبالیہ اس پیش کرے ۔ داوخت آ وزیراعلیٰ ءِ ڈٹ انا بارواٹی حوال ترسا پاننگاکہ ڈٹ انا کساس خڑچ 260ملین روپئی ءِ ہرادے جون 2021 اسکان پورو کننگک، ڈٹ انا پوروی آن سمنگلی و ایب وکیب نا آبادی تے بے اڑاند ہن و بر نا آسراتی ملک ۔ داوخت آ وزیراعلیٰ ڈٹ انا تختی نا نقاب کشائی ءِ ہم کرے ، پی اے بیس سرمننگ آ ایئر وائس مارشل، بیس کمانڈر و ایلو آفیسر آک وزیراعلیٰ ءِ بخیر کریر ۔
