اسلام آباد ۔ 12 فروری (اے پی پی) صدر مملکت ڈاکٹر عارف علوی پارینے کہ قومی اسمبلی نا اسٹریٹجک پلان 2019-23 ء مقننہ ءِ نیزگاری، بے روزگاری و افراط زر کون آ ویل آتے ایسر کننگ اٹ کمک ایتک وخت اس کہ اسپیکر قومی اسمبلی اسد قیصر نا پاننگ ئس کہ ای بیرہ پی ٹی آئی نا اسپیکر آخا بلکن مچ آ ایوان نا کسٹوڈین اُٹ، گچین کانود جوڑ کننگ نا مسخت الس ءِ ریلیف تننگ نا ءِ و پارلیمنٹ نا کمک اٹ السی فائدہ غاتا رکھ ءِ پک کننگ مریک ۔ او چارشنبے نادے آ پاکستان انسٹی ٹیوٹ آف پارلیمنٹری سروسز اٹی قومی اسمبلی اسٹریٹجک پلان 2019-23ء نا رپورٹ ءِ جاری کننگ نا وخت آ صدر مملکت ڈاکٹر عارف علوی تینا جاری ویڈیو کلہو اٹی قومی اسمبلی نا باسک آتا کانود جوڑ کننگ نا لاءخی تیٹی ودکی نا گرج آ زور شاغا و پارے کہ پی اے سی نا باسک آتا ہم تربیت نا گرج ءِ ۔ اوپارے کہ اسٹریٹجک پلان مقننہ نا نیزگاری، بے روزگاری و افراط زر کون آ ویل آتے ایسر کننگ اٹ کمک ایتک ۔ اوکان پد دود آن تران کرسا اسپیکر قومی اسمبلی اسد قیصر پارے کہ اسٹریٹجک پلان آن کانود جوڑ کننگ نا عمل و چاروکی گچین مریک ۔ اوپارے کہ قائمہ کمیٹی تا باسک آتا کاریم نا کچ اٹی داڑآن ودکی مریک ۔ اسپیکر پارے کہ چندی بشخ آتا چاہندار آتے قائمہ کمیٹی تتون گنڈنگک تانکہ اوفتا کارکڑد اٹی گچینی بننگ کے ۔ اسپیکر پارے کہ نن اسمبلی سیکرٹریٹ نا ملازم آتا کاریم نا کچ اٹی ودکی کن اوفتا ترقی تیٹی میرٹ ءِ بنداو کرینن و نن 300 اسمبلی ملازم آتے ترقی تسونن ۔ اسپیکر پارے کہ نن پارلیمانی سفارتکاری نا بناءِ کرینن ۔ بین الپارلیمانی یونین، دولت مشترکہ تون اوار بھلا بھلا فورم تیا پاکستان نا گچین وڑاٹ ترجمانی ءِ کرینن ہراڑآن پاکستان نا دروشم گچین مریک و دنیا تون واپار ءِ ودفنگ نا وارخواہی تیٹی ودکی مریک ۔ اوپارے کہ دنیا نا پارلیمان تا نیام اٹ پارلیمانی سفارتکاری نا کمک اٹ فرینڈ شپ پڑک اس جوڑ کرینن ۔ ہراڑآن یورپ، افریقہ و نیامی ایشیائی ملک آتون رابطہ غاتے مون آ دننگ اٹ کمک رسینگک ۔ اوپارے کہ فرینڈ شپ گروپ آتے کن نن فنڈہم فراوان کرینن ۔ کشت وکشار و سبی پیک نا بابت جوڑ خصوصی کمیٹیک گچین وڑاٹ کاریم کننگ ءُ ۔ اوپارے کہ نن پپس ءِ بطور ادارہ گچین کننگ خوانہ ۔ اسپیکر پارے کہ او بیرہ پی ٹی آئی نا اسپیکر آخا بلکن مچ آ ایوان نا کسٹوڈین ءِ ۔ گچین کانود جوڑ کننگ نا مسخت السی فائدہ غاتا رکھ و ریلیف تننگ ءِ ۔
