اسلام آباد ۔ 12 فروری (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ پائیدار شونداری و ودکی کن ننے پائیدار پالیسی تے برجا تخوئی مریک ، مستین نا حکومت آتا پالیسی تا سوب آن پائیدار ودکی نا مزل دوئی مننگ کتو، راج انا نیزگار و نزور تپہ غاتے کبینی نا اثرآتیان بچفنگ کن جامع گام گیج کننگانے، حسابات جاریہ نا نسخان اٹی نمان کمتی بسنے، حکومت گام گیج آتیان بروک آ منہ تُو اٹی کبینی ٹی پین کمتی بریک، الس آن خواست ءِ کہ او حکومت نا کنڈآن تروک آ آسراتی تا فائدہ ءِ ہرفسا یوٹیلیٹی اسٹور آتیان کنوئی آ گڑاتے ہلیر ، یوٹیلیٹی اسٹور آتیا ہلوک آتا کچ اسہ کروڑ اسکان ودفینہ وخت اس کہ پین 2ہزار یوٹیلٹی اسٹور ملفنہ ۔ چارشنبے نادے آ قومی اسمبلی ٹی ملک انا اقتصادی حالیت آتیا شرہ ٹی بشخ ہلنگ نا وخت آ پالیسی بیان ترسا وزیراعظم نا سلاہکار خزانہ و محصولات ڈاکٹر عبدالحفیظ شیخ ملک انا زرگزرانی پس منظر و پیش منظر ءِ سرجمی اٹ مون آ تخا و پارے کہ پاکستان زرگزران نا ویل آتا بنداوی سوب آک ءُ ہرافتیا شرہ کننگ آن بیدس نن مون آ ہِننگ کپنہ ۔ اوپارے کہ غٹ آن بھلا حقیقت داد ے کہ تدوک آ 72 سال اٹی سیاسی سوگوی دوئی متنے و اسہ وزیراعظم اس ہم تینا مد ءِ پورو کتنے ۔ زرگزران سیاسی سوگوی تون گنڈوک مریک ۔ داوڑ ملک مننگ کپک ہراڑے خلقت شون ہلوک مرے و اوفتا ملک شون ہلوک مف ۔ اگہ ننے مون آ ہنوئی ءِ و شون ہلوک قوم آتون سلوئی ءِ تو ننے تینا خلقت آ دھیان تروئی مریک ۔
