سیالکوٹ ۔ 12 فروری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان نا کماشی ٹی نن پوسکن آ شونہال پاکستان نا بنداو ءِ تخانن دا بنداو تیا تفوک آ ماڑی کرپشن آن پاک، زرگزرانی و اقتصادی وڑاٹ سوگو و مثالی پاکستان نا ضامن مریک، وزیراعظم عمران خان ہمو لیڈر ءِ ہرا بروک آ چین تا روشنا آخبت آ سجفک، سیاست دانک تو بیرہ تینا بروک آ گچین کاری تا سجفرہ و ٹائم پاس کیرہ ، کسب کار پروگرام نا رداٹ پنجاب اٹی ٹیوٹا نا کمک اٹ 50 ہزار بندغ وخت اس کہ مدرسہ غاتا 75ہزار طالب علم آتے تربیت یافتہ کننگ نا عمل بناکرینے ، اولیکو وار بینک آف پنجاب ءِ الس نا خذمت کن کاریم اٹ اتنگ انگ ءِ ، مستین اٹی دا بینک ءِ ہم سنگت آتا فیکٹری و کارخانہ غاتے اول وام تا فراوانی و ولدا معافی کن کاریم اٹ اتنگانے ۔ او چارشنبے نادے آ داڑے سرسہب ورنا پروگرام نا دود آن تران کریکہ ۔ وزیراعظم نا خصوصی کمکار ڈاکٹر فردوس عاشق اعوان پارے کہ مصنوعی ذہانت ڈٹ صدر مملکت ڈاکٹر عارف علوی نا است آن خڑک ءِ و ڈیجیٹل پاکستان ہرانا بنداو ءِ وزیراعظم عمران خان تخانے اوٹی مصنوعی ذہانت اہم ءُ جزو اسے ، ننکن بھاز خوشی نا سوب ءِ کہ صدر مملکت مصنوعی ذہانت ڈٹ انا تینٹ سرپرستی ءِ کرسا دا کلہو ءِ تننگ ءِ کہ لیڈر سرکڑدہ ہی کیک تو قوم اونا پیروی ءِ کیک ۔ اوپارے کہ سرکڑدہ تینا قوم انا اولیت آتے معلومدار کیک ، لیڈر و سیاست دان تیٹی دا پرخ مریک لیڈر بروک آ چین کن پلان جوڑ کیک و سیاست دان تینا بروک آ گچین کاری تیکن پلان کیک، وزیراعظم عمران خان تینا گچین کاری کن آخا بروک آ چین کن ڈٹ جوڑ کننگ ءِ، ننے الس نا واک اٹ اونا پالیسی تے مون آ دروئی ءِ ۔ اوپارے کہ 50 ہزار ورناتے پنجاب اٹی ٹیوٹا نا کمک اٹ تربیت تننگ انگ ءِ ، ٹیوٹا اسہ برائے نام ادارہ اس ئس اودے دنیا نا گچین ادارہ غاتون ہم گرنچ کرسا فنی تربیت نا ادارہ ٹی بدل کننگ نا وزیراعظم نا است خواہی و تغ ءِ وزارت تعلیم تعبیر تننگ اٹ مصروف عمل ءِ، داپروگرام نا رداٹ 2ہزار کسبی معیارات مقرر کرسا تربیت یافتہ ورناتے کھیپ اس تیار کننگ انگ ءِ ۔ اوپارے کہ ملک انا 70 مدرسہ غاتے ٹی 75 ہزار طالب علم ءِ 70 پوسکن آ کلاس روم تیٹی پوسکن آ ٹیکنالوجی نا بارواٹی تربیت تننگ انگ ءِ و مدرسہ غاتے ٹی 5سینٹر آف ایکسیلینس ہم جوڑ کننگانے ۔
