سیالکوٹ ۔ 12 فروری (اے پی پی) صدر مملکت ڈاکٹر عارف علوی پارینے کہ پاکستان اٹی حالیت آک سازگار مننگ ءُ و اینو دنیا داڑے زرکاری کننگ کن تیار ءِ ننے ہم دانا تیاری ءِ کروئی مریک، صنعت آتا مون آ دننگ کن ورناتا لاءخی تیان فائدہ ہرفوئی مریک ۔ سرسہب ورنا پروگرام تینا شفافیت و فائدہ غاتا لحاظ اٹ دا بابت سودمند مریک ۔ داخیال آتا درشانی ءِ او چارشنبے نادے آ سیالکوٹ اٹی سرسہب ورناپروگرام نا رداٹ چیک بشخنگ نا دود آن تران کرسا کرے ۔ صدر مملکت پارے کہ دنیا پاکستان اٹی زرکاری کننگ کن تیار ءِ ، ننے ہم دا بارواٹی تیاری کروئی مریک ۔ اوپارے کہ سرسہب ورنا پروگرام اٹی شفافیت ستاکڑزک ۔ پروگرام اٹی بیدس سفارش نا وام ہلنگ انگ ءِ ۔ دا پروگرام میرٹ، مقابلہ نا فضاء و گچین کارکڑد نشان تننگ نا موقع فراوان کیک ۔ اوپارے کہ پاکستان اٹی لاءخ افرادی قوت ارے، ورناتے تعلیم و کسب نا فراوانی ننا زمواری ءِ ، صنعت آتا مون آ دننگ کن ورناتا لاءخی تیان فائدہ ہرفوئی مریک ۔ دا چرجوئی ٹی پوسکن آ چین ءِ پوسکن آ دور انا خواست آتیان ہم گرنچ کروئی ءِ ۔ اوپارے کہ انٹرنیٹ نا سوب آن پوسکن آ علم اسکان رسینگ آسان مسنے، ورناک تینے پوسکن آ علم آن آراستہ کننگ کن انٹرنیٹ و ٹیکنالوجی آن فائدہ ہرفر ۔ صدر مملکت پارے کہ دہشت گردی نا برخلاف سرسہب جنگ آ پاکستانی سیکورٹی فورس آک خراج تحسین نا حقدار ءُ ۔ سیکورٹی فورس آتا قربانی تیان ملک اٹی امن و روشنائی بحال مس ۔ ننے قوم انا حوصلہ ءِ شیف خلنگ نا جاگہ غا پت تروئی مریک انتئے کہ پست حوصلہ والا قومک وخت اس ہم شون ہلنگ کپسہ ۔ اوپارے کہ بھارت پاکستان آ جلہو نا کوشست کرے تو اودے بوز اٹ کنوئی تما، بھارتی راج جنگی گنوکی ٹی اختہ مننگ نا شاہدی ءِ تس وخت اس کہ پاکستان نا حکومت ، میڈیا و راج امن نا ہیت ءِ کریر ۔ داوخت آ وزیراعظم نا خصوصی کمکار حوالکاری و شین کاری فردوس عاشق اعوان و وزیراعظم نا خصوصی کمکار امور نوجوانان عثمان ڈار ئسک ہم تران کریر ۔
