اسلام آباد ۔ 12 فروری(اے پی پی) وزیراعظم عمران خان پارینے کہ بے آسرا و محرومی تا گواچی چناک ریاست نا زمواری ءِ،اوفتے تعلیم ، جان جوڑی و ایلو آسراتی تتون اوار اوار رکھ چاگڑد اس فراوان کننگ حکومت نا اولیت ءِ، چناتے ہروڑنا استحصال آن بچفنگ و اوفتے رکھ چاگڑد اس فراوان کننگ نا بابت ہروڑنا گام گیج چست کننگے ۔ داخیال آتا درشانی ءِ او سیکرٹری سوشل ویلفیئر خیبر پختونخوا محمد ادریس و چیئرپرسن چائلڈ پروٹیکشن بیورو پنجاب سارہ احمد تون گپ و تران کرسا کرے ہرا چارشنبے نادے آ داڑے اوڑتون اوڑدہی کرے ۔ اوڑدہی ٹی چناتا حق انا رکھ انا بابت کروک آ گام گیج آتیا سرجم گپ و تران کننگا ۔ وزیراعظم پارے کہ چناتا تعلیم، جان جوڑی و ایلو آسراتی تتون اوار اوار رکھوک چاگڑد فراوان کننگ حکومت نا اولیت ءِ ۔ چناک ننا آخبت ءُ ۔ آخبت نا جوڑ کروک آتیا زرکاری و اوفتا گچین نشو ونما غان ملک و قوم انا پائیدار شونداری ممکن مریک ۔ اوپارے کہ بے آسرا و محرومی تا گواچی چناتا رکھ و اوفتے تعلیم و جان جوڑی نا گچین آسراتی تا فراوانی آ پبی چکار کننگے ۔ بے آسرا و محرومی تا گواچی چناک ریاست نا زمواری ءِ ۔ وزیراعظم پارے کہ چناتے ہروڑنا استحصال آن بچفنگ و اوفتے رکھ چاگڑد اس فراوان کننگ نا بابت ہروڑنا گام گیج چست کننگے ۔
