وزیراعظم عمران خان نا میکنزی نا گلوبل منیجنگ ڈائریکٹر کیون سنیدر تون اوڑدہی ٹی گپ و تران

اسلام آباد۔ 11 فروری (اے پی پی) وزیراعظم عمران خان پارینے کہ ساڑی حکومت کاروباری تپہ ءِ ہروڑنا آسراتی فراوان کننگ نا عزم کرینے، پاکستان اٹی سیل و سوات نا بشخ اٹی بے شمار وارخواہی ارے، سیل و سوات نا مون آ دننگ آن زرمبادلہ کٹیا ٹی کمک رسینگک و ورناتے کن روزگار نا وارخواہی ودی مریک، توانائی نا بشخ اٹی نسخان تا توننگ و الس آ تموک آ بھاریم اٹی کمتی اتنگ حکومت نا اولیت ءِ۔ داخیال آتا درشانی ءِ او پنی آ ایڈوائزری و کنسلٹنٹ کمپنی میکنزی نا گلوبل منیجنگ ڈائریکٹر کیون سنیدر تون گپ و تران کرسا کرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی وزیراعظم نا سلاہکار محمد شہزاد ارباب، وزیر خزانہ خیبر پختونخوا تیمورسلیم خان جھگڑا، چیئرمین زرکاری بورڈ سید ذوالفقار حیدر گیلانی ئسک ہم ساڑی ئسر۔ ڈل وزیراعظم ءِ چندی بشخ آتے ٹی ڈٹ بندی و انتظامی باندات آتے ٹی فراوان کروک آ سلاہ و سوج و کمکاری نا بابت بریف کرے۔ کیون سنیدر وزیراعظم ءِ پارے کہ میکنزی کمپنی تدوک آ کیہی سال آن پاکستان اٹی خذمت سرانجام تننگ ءِ و پالیسی سازی خاص وڑاٹ گڈ گورننس و چندی بشخ آتے ٹی گچین پالیسی سازی نا رداٹ تینا چاہندارانہ سلاہ و چندی ادارہ غاتے فراوان کرسا کرینے تانکہ السی فائدہ غاتیا مبنی پالیسی تا ٹہیفنگ و گچین بست و بند ءِ پک کننگ مرے۔ وزیراعظم ڈل اتون گپ وتران کرسا پارے کہ حکومت نا اولیت کاروبار اٹی کمکاری و سیل و سوات نا مون آ دننگ ءِ۔ اوپارے کہ مستین اٹ حکمران تپہ تینا فائدہ غاتے کن کرپشن کریر و دا مسخت کن ادارہ غاتے نزور کننگا۔ سول ادارہ غاتا نزور مننگ آن کرپشن و الس نا تکلیف آتے ٹی ودکی مس و حکومت نا کنڈآن السی فائدہ غاتا رکھ انا لائخی زہمی مس۔ اوپارے کہ ساڑی حکومت ملک انا زرگزرانی حالیت آتا رداٹ کاروباری تپہ غاتے ہروڑنا آسراتی فراوان کننگ نا عزم کرینے تانکہ کاروبار اٹی آسانی ودی مرے و زرگزرانی عمل ترند مرے ہراڑان راجی و معاشی شونداری ءِ ممکن کننگ مرے۔ سیل و سوات آ ہیت کرسا وزیراعظم پارے کہ پاکستان اٹی سیل و سوات نا بابت بے شمار وارخواہی ارے۔ سیل و سوات نا مون آ دننگ آن ہراڑے زرمبادلہ کٹیا کننگ اٹ کمک رسینگک ہموڑے ورناتے کن نوکری تا بے شمار وارخواہی ودی مریک۔ اوپارے کہ سیل و سوات نا مون آ دننگ خاص وڑاٹ انفراسٹرکچر نا جوڑ کننگ و ہندی قدر انا رداٹ سیل و سوات نا چاگڑد و آسراتی فراوان کننگ نا بابت آن میکنزی نا کنڈآن تروک آ چاہندارانہ سلاہ تا خیرمقدم ءِ کننگک۔ اوڑدہی ٹی حکومتی بشخ اٹی خڑچ آتے ٹی کمتی اتنگ و زرکاری پیسہ غاتا کاریم اٹ اتنگ اٹ کفایت شعاری و اونا گچین کاریم اٹ اتنگ ءِ پک کننگ نا بابت ہم گپ و تران کننگا۔ وزیراعظم پارے کہ توانائی نا بشخ اٹی مستین نا حکمران تا بد انتظامی و ہیبدار ڈٹ بندی نا مچ آ بھاریم الس ءِ سگوئی تمنگ ءِ۔ توانائی نا بشخ اٹی چندی مد اٹ مروک آ نسخان تے توننگ و الس آ تموک آ بھاریم اٹی کمتی اتنگ حکومت نا اولیت ءِ۔ وزیراعظم پارے کہ دا بشخ آتے ٹی جہانی وڑاٹ امنا کروک گچین طرزعمل و ڈغاری راستکی تے مون آ تخسا جوڑ کروک آ سلاہ و سوج آتا خیرمقدم ءِ کننگک۔