ووہان اٹی پاکستانی طالب علم آتون پدریسہ رابطہ، اوفتا خاہوت آتے اوفتا خیر و خیریت آن معلومدار تخنگے، وزیراعظم عمران خان نا سیکرٹری خارجہ ءِ پارت

اسلام آباد۔ 11فروری (اے پی پی) وزیراعظم عمران خان پارت کرینے کہ ووہان اٹی ساڑی پاکستانی طالب علم آتون پدریسہ رابطہ کننگے و اوفتا خاہوت آتے ہم اوفتا خیروخیریت آن پدریسہ معلومدار تخنگے۔ سے شنبے نادے آ وزیراعظم تون خصوصی کمکار جان جوڑی ڈاکٹر ظفر مرزا و خصوصی کمکار اوورسیز پاکستانیز سید ذوالفقار عباس بخاری ئسک اوڑدہی کریر۔ سیکرٹری خارجہ سہیل محمود ہم اوڑدہی ٹی ساڑی ئس۔ وزیراعظم چین اٹی ساڑی پاکستانی خاص وڑاٹ ووہان اٹی ساڑی پاکستانی طالب علم آتا غٹ سرجم و ساڑی حالیت آتا ہریفے۔ وزیراعظم پاکستانی طالب علم آتا جان جوڑی نا بارواٹی ہم سرجم حوال ہلک۔ وزیراعظم سیکرٹری خارجہ ءِ پارت کرے کہ ووہان اٹی ساڑی پاکستانی طالب علم آتون پدریسہ رابطہ تخنگے و اوفتا خیرو خیریت نا بارواٹی اوفتا خاہوت آتے پدریسہ معلومدار تخنگے۔ خصوصی کمکار جان جوڑی کرونا وائرس نا بابت آن ساڑی حالیت و وائرس آن بچنگ کن ملک اٹی اختیار کروک آ رکھی گام گیج آتا بارواٹی وزیراعظمءِ حوال تسر۔