اسلام نا رغاموک آکسر تا رداٹ نن بایدے بیدس پک کننگ آن ہچ ءُ حوال اس مون آ گدریفپن، صدر مملکت ڈاکٹر عارف علوی نا جہانی کانفرنس آن تران

اسلام آباد۔ 11 فروری (اے پی پی) صدر مملکت ڈاکٹر عارف علوی جوان انگا لوز آتا پٹنگ تون گچین ءُ کلہو اس سر کننگ آ زور شاغسا پارے کہ نن خبر تے مون آ گدریفنگ آن مست المی ءِ کہ اوفتے پک کین، جھیڑہ غاتے ٹی دروغ انا خبر تا کمک اٹ قوم تے بدنام کننگک۔ داخیال آتا درشانی ءِ او سے شنبے نادے آ تنازعات و میڈیا نا کڑد انا بابت جہانی کانفرنس آن تران کرسا کرے۔ صدر مملکت پارے کہ لوز آتا کاریم اٹ اتنگ گڑاس بندغ ءِ خڑک اتنگ و مر کننگ نا سوب مریرہ۔بھاز وخت ننا چناک ہم ننا لوز آتا پین معنہ اس ہلیرہ۔ اوپارے کہ نن جوان انگا لوز آتون اوار اوار گچین کلہو آتا سرکننگ آہم چکار کین۔ مچ آ دنیا ٹی میڈیا مارکیٹنگ نا کمک اٹ انسانی نزوری تیان فائدہ ہرفے۔ اوپارے کہ ای میڈیا ٹی جعلی خبر آتا تالانی آہم پٹ وپولی مقالہ اس نوشتہ کرینٹ۔ (عراق اٹی) بھلو کچ اسے آ تباہی تالان کروک آ سلہہ ساڑی الوکہ ولے (ولدا ہم) جنگ ءِ بش کننگا۔ پلوامہ جلہو آن پد بھارت پاکستان آ جلہو کرے، پاکستان بھارت نا اِرا جہاز ءِ بٹے و بندی پائلٹ ءِ پدی تس۔ پاکستان نئے بیرہ تینا دفاعی لائخی تے منفے بلکن تینے امن پسند اس ہم ثابت کرے۔ اوپارے کہ نن خبر تا مون آ دننگ آن مست اوفتے پک کین۔ ورناچین جعلی خبر تیان تینے ہر ممکن حد اسسکان بچفر، قوم اسے نا برخلاف کارروائی آن مست اودے بدنام کننگک۔ اوپارے کہ اسلامی رغاموک آکسرتا رداٹ نن بایدے بیدس پک کننگ آن ہچ ءُ حوال اس مون آ گدریفپن۔ جھیڑہ غاتے ٹی قوم تے دروغ انا خبر تا کمک اٹ بدنام کننگک۔