اسلام آباد۔ 11 فروری (اے پی پی) بنجائی وزیر امو رکشمیر و گلگت بلتستان علی امین خان گنڈاپور ایل او سی آ بھارتی جارحیت نا ترندی اٹ مذمت ءِ کرسا پارینے کہ ایل او سی آ بھارتی جارحانہ کارروائی آزاد کشمیر و پاکستان نا الس ءِ مقبوضہ کشمیر نا الس نا حق خودارادیت نا مخ تفی آن ہچ ءُ حالیت اسے ٹی دزکش کننگ کپک وپاکستان نا ہر بندغ آخیریکو دم اسکان کشمیری تا مخ تفی ءِ برجاتخرہ۔ اوپارے کہ بھارت مقبوضہ کشمیر نا حالیت آتیان دنیا نا چکار ءِ اسہ کنڈ کننگ کن ایل او سی آ شاری آبادی ءِ شست کیک۔ اوپارے کہ سد آ کودک شاری تے شہید کننگ آن پد ہم بھارت ایل او سی آ رہینگوک آ آزاد کشمیر نا الس نا عزم ءِ پرغنگ اٹ بے سہب مسنے۔ بنجائی وزیر پارے کہ مچ آ پاکستانی قوم ایل او سی آ رہینگوک آ نرزور و غیور کشمیری تے بھارتی جارحیت نا پرعزم وڑاٹ مقابلہ ءِ کننگ آ اوفتے سلام پیش کیرہ۔ اوپارے کہ بنجائی حکومت ایل او سی آ رہینگوک آ آزاد کشمیر نا شاری تا رکھ اکن 3 ارب روپئی نا خڑچ آن اسہ جامع ڈٹ اسے نا بناءِ کرینے ہراڑآکاریم نا بناءِ زوت کننگک۔ اوپارے کہ دا ڈٹ انا رداٹ ایل او سی آ رہینگوک آ شاری تیکن بنکرز، سڑک، ہیلتھ یونٹس و بجلی نا نظام ءِ اپ گریڈ کننگ انگءِ۔ علی امین گنڈاپور پارے کہ دامیگا ڈٹ انا اولیکو مرحلہ ٹی ایل او سی آ رہینگوک آ شاری تا جان و مال انا رکھ اکن سد آ بنکرزآتا تفنگ ءِ اولیتی بنداو تیا پورو کننگک و اوڑتون اوار اہم ہند آتیا فرسٹ ایڈ یونٹس نا جوڑ کننگ و المی سڑک آتا تفنگ ءِ پک کننگک۔
