اسلام آباد۔ 11 فروری (اے پی پی) پاکستان سپورٹس بورڈ انا ایگزیکٹو کمیٹی نا دیوان بنجائی وزیر بین الصوبائی رابطہ ڈاکٹر فہمیدہ مرزا نا کماشی ٹی سے شنبے نادے آ داڑے وزارت اٹی اڈ ہلک۔ دیوان اٹی سیکرٹری آئی پی سی، ڈی جی پی ایس بی و ڈی ایس سپورٹس ئسک ہم ساڑی ئسر۔ دیوان اٹی چندی اہم ٹک آتیا سجفنگا ہرافتے ٹی مالی باندات، ملازم آتا بابت باندات، بجٹ، سپورٹس کمپلیکس نا اپ گریڈیشن، سیف گیمز انا تمغہ ءِ کٹوک آتے نغد انعام تننگ و ایلو باندات آک اوار ئسر۔ بنجائی وزیر داہیت آ زور شاغا کہ ملازم آک ادارہ یا نظام اسے جوان وڑاٹ چلیفنگ کن کلیدی ءُ کڑد اس ادا کیرہ۔ بنجائی وزیر ملازم آتا گڑتی و غاوتے زوت آن زوت ایسر کننگ آہم زور شاغا۔ پی ایس بی نا گریڈ 17 و داڑان بڑزانا ملازم آتا طبی الاؤنس اٹی ساڑی تضاد آتا بابت باندات آتے ہم مون آ اتنگا۔ ایگزیکٹو کمیٹی نا باسک آک امنائی وڑاٹ دا فیصلہ کریر کہ گریڈ 17 و اوکان بڑز انا غٹ ملازم ہرا تینا میڈیکل الاؤنس نا حد آن گدرینگانو، اوفتے ودکی پیسہ غاتے پدی تروئی مریک، ہنداخاطرآن دا ویل انا ایسری کن سیکرٹری آئی پی سی نا چاروکی ٹی اسہ کمیٹی اس ٹہیفنگ آ امنا کننگا۔ ریسلر دین محمد نا اہم باندات ءِ ہم مون آ تخنگا۔ دین محمد 1954ء نا ایشین گیمز انا اولیکو پاکستانی گولڈ میڈلسٹ ءِ۔ گوازی تا پڑ اٹ دین محمد نا خذمت آتے امنا کرسا بنجائی وزیر ناجوڑ گوازی گر آتے پنچ لکھ نغد پیسہ تننگ نا پارت کرے۔ اومتکن آ گوازی گر آتے کن پین کمک نا دوئی کننگ کن وزیراعظم ءِ اسہ سمری اس پیش کننگ آہم زور شاغا۔ ڈاکٹر فہمیدہ داہیت آ است جمی نا درشانی ءِ کرے کہ پی ایس پی تدوک آ ہفت تُو انا وخت اٹی تینا ذریعہ اٹ محصولات نا پیدوار اٹی 186 درسد ودکی دوئی کرے۔ سال 2018ء آن 2019ء ٹی کل کٹیا ناکساس کم و ود 9.5 ملین روپئی ئس ہرا 2019ء آن 2020ء ٹی 17.5 ملین اسکان ودار۔ ڈاکٹر فہمیدہ مرزا دا مسخت ءِ عملی دروشم اس تننگ اٹ ایس بی نا ٹیم انا کوشست آتا ستاءِ کرے۔ و داڑازور شاغا کہ ”داسہ ہم بھاز لائخی ارے و نن سپورٹس کمپلیکس ءِ اپ گریڈ کرسا اوڑان پین فائدہ ہرفنگ کینہ“۔ دیوان نا ایسر آ ایگزیکٹو کمیٹی نا باسک آک پاکستان اولمپک ایسوسی ایشن نا گچین کاری تیا تینا گڑتی تا درشانی ءِ کرے ہرافتا بارواٹی اونا پاننگ ئس کہ دا غیر منصفانہ و غیر شفاف گچین کاری ئسر۔ ڈاکٹر فہمیدہ مرزا زور شاغسا پارے کہ دا ڈول نا وڑآ عمل ملک اٹی گوازی تا جم چاگڑد کن نسخان دہ مننگ ءِ۔ ڈاکٹر فہمیدہ مرزا دا عزم انا درشانی ءِ کرے کہ او گوازی تا پڑاٹ مثبت بدلی اتنگ کن غٹ تر کوشست آتے کیک۔
