اسلام آباد۔ 11 فروری (اے پی پی) پاکستان تحریک انصاف نا راہشون سینیٹر فیصل جاوید نجی ٹی وی چینل نا پروگرام تون گپ و تران کرسا پارے کہ تحریک انصاف حکومت اٹ بننگ آن پد اولیکو مرحلہ ٹی زرگزران ءِ خواتہ مننگ آن بچفے انتئے کہ زرگزران خواتہ مننگ والا ئس۔ اوپارے کہ مستین نا حکومت آک تینٹ دا پاریرہ کہ ننے آن پد پین اسہ حکومت اس ہم زرگزران ءِ سنبھالنگ کپک انتئے کہ اونا بیڑا ءِ اوفک غرق کریسر، نن اقتدار اٹ بننگ آن پد اولیکو مرحلہ ٹی زرگزران ءِ سنبھالان، اینو ورلڈ بینک و آئی ایم ایف غٹ پاننگ ءُ کہ پاکستان نا زرگزران سہی مسنے۔ اوپارے کہ داسہ ایلو مرحلہ ٹی الس اسکان اونا اثرآک کارہ ہرانگیا مستین نا حکوتم آک ملک ءِ دریسر۔ اوپارے کہ اگہ عمران خان نا جاگہ غا پین اس مسکہ تو کبینی اینوآن اِرا ہنداخہ مسکہ و ڈالر 250 آ مسکہ، دا عمران خان ءِ ہرا مشکل وخت اٹی زرگزران ءِ سنبھالا و داسہ لس بندغ اسکان دانا اثرآک کارہ۔ سینیٹر فیصل جاوید مستی پارے کہ ننے داہیت انا احساس ارے کہ کبینی ودانے ولے بروک آ وخت اٹی کبینی کم مریک، نن احساس پروگرام نا فنڈ اٹی ودکی کرینے و داڑتون اوار اوار یوٹیلیٹی اسٹور آتیا ہم بھلو ریلیف پیکج اس تننگک تانکہ الس ءِ کبینی آن ریلیف ملے۔ اسہ سوج اسے نا ورندی ٹی اوپارے کہ ننا سیوتی تتون غٹ باندات آک ایسر مسنو۔
