ترک صدر نا دورہ پاکستان ہڑتوم آ کنڈآتا تعلقداری تے پین سوگو کننگ، تین پہ تینی کمکاری ءِ مون آ دننگ اٹ اہم ءُ مزل نا نشان اس مریک، وزیراعظم عمران خان نا دیوان اٹی گپ وتران

اسلام آباد۔ 10 فروری (اے پی پی) وزیراعظم عمران خان پارینے کہ پاکستان و ترکی نا برادرانہ تعلقداریک تاریخی ءُ اہمیت اس تخرہ، ہڑتوم آ ملک آک مشکل نا ہر ساہت اٹی اسہ ایلو تون ہم کوپہ سلیسنو، ترک صدر رجب طیب اردوان نا دورہ پاکستان ہڑتوم آ کنڈآتا تعلقداری تے پین سوگو کننگ و چندی بشخ آتے ٹی کمکاری ءِ مون آ دننگ اٹ دورہ اہم ءُ مزل نا نشان اس مریک۔ داخیال آتا درشانی ءِ او دوشنبے نادے آ ترک صدر رجب طیب اردوان نا دورہ پاکستان نا بابت بڑزکو کہول انا دیوان نا کماشی ءِ کرسا کرے۔ دیوان اٹی وزیر اقتصادی امور حماد اظہر، سلاہکار خزانہ ڈاکٹر عبدالحفیظ شیخ، سلاہکار واپار عبدالرزاق داؤد، تعلقدار وزارت آتا بنجائی سیکرٹریز و سینئر آفیسر آک ساڑی ئسر۔ دیوان اٹی ترک صدر رجب طیب اردوان نا دورہ پاکستان اٹی ہڑتوم آ ملک آتا نیام اٹ چندی بشخ آتے ٹی ہڑتوم آ کنڈآتا تعلقداری و کمکاری ءِ مون آدننگ نا بابت سرجم گپ و تران کننگا۔ وزیراعظم عمران خان پارے کہ پاکستان و ترکی نا برادرانہ تعلقداریک تاریخی ءُ اہمیت اس تخرہ و ہڑتوم آ ملک آک مشکل نا ہر ساہت اٹی اسہ ایلو تون ہم کوپہ سلیسنو۔ اوپارے کہ ترکی کشمیر نا ویل آ ہرا پیدوار وڑاٹ پاکستان نا اصولی موقف نا مخ تفی ءِ کرینے او ستاکڑزک۔ اوپارے کہ ہڑتوم آ ملک آتا سرکڑدہ غاتا مخلصانہ کوشست ءِ کہ پاکستان و ترکی نا نیام اٹ ہر بشخ اٹی ہڑتوم آ کنڈآتا تعلقداری خاص وڑاٹ زرگزرانی تعلقداری تے پین سوگو کننگے۔ وزیراعظم پارے کہ ہڑتوم آ کنڈآتا تعلقداری تے پین سوگو کننگ و چندی بشخ آتے ٹی کمکاری ءِ پین مون آ دننگ اٹ ترک صدر نا دورہ اہم ءُ مزل نا نشان اس مریک۔ وزیراعظم تعلقدار محکمہ غاتا سیکرٹری تے پارت کرے کہ بڑزکو کہولی دورہ ٹی طے مروک باندات آتیا عملدرآمد و اوفتے ایسر اسکان سرکننگ آ خصوصی چکار کننگے۔ وزیراعظم پاکستان و ترکی نا نیام اٹ ہڑتوم آ کنڈآتا معاہدہ غاتیا پیش رفت ءِ پک کننگ کن وزیراقتصادی امور ءِ زمواری تس۔ وزیراعظم وزیر اقتصادی امور ءِ پارت کرے کہ طے مروک باندات آتے ٹی پیش رفت نا جاچ ءِ ہلنگ کن ہر تُو آ جاچ دیوان اس اڈتننگے۔