اسلام آباد۔ 10 فروری (اے پی پی) وزیراعظم نا خصوصی کمکار سمندر پار پاکستانیز زلفی بخاری دا یخین ءِ ظاہر کرینے کہ چین کرونا وائرس آن ودی مروک آ چیلنج اتون سرسہبی اٹ مون ایتک، چینی حکومت نا کروناوائرس نا توننگ و پاکستانی شاری تا رکھ اکن گام گیج آک ستاکڑزرہ۔ داخیال آتا درشانی ءِ او دوشنبے نادے آ پاکستان اٹی چین نا سفیر یاؤجنگ تون اوڑدہی ٹی کرے۔ سلاہکار جان جوڑی ڈاکٹر ظفر مرزا ہم اوڑدہی ٹی ساڑی ئسک۔ اوڑدہی ٹی چین اٹی ساڑی پاکستانی تا جان جوڑی و سلامتی نا بابت اہم باندات و چین نا جامعہ غاتے ٹی ساڑی پاکستانی طالب علم آتا رکھ انا بابت خصوصی گپ و تران کننگا و چین نا شار ووہان اٹی ساڑی پاکستانی تے خور اتون اوار ایلو تروک آ آسراتی تا ہم جاچ ءِ ہلنگا۔ داوخت آ وزیراعظم نا خصوصی کمکار سمندر پار پاکستانیز زلفی بخاری نا کنڈآن جندی وڑاٹ ووہان آ ہِننگ و ہموڑے ساڑی طالب علم آتون اوار پاکستانی تتون اوڑدہی آ اصرار کننگا۔ زلفی بخاری پارے کہ کرونا وائرس نا توننگ و پاکستانی شاری تا رکھ اکن چینی حکومت نا گام گیج آک ستاکڑزرہ، پورو باوری ءِ کہ چین کرونا وائرس آن ودی مروک آ چیلنج اتون سرسہبی اٹ مون ایتک۔ اوپارے کہ قوم چین اٹی ساڑی مارو مسن تا سلامتی ورکھ اکن فکر کننگ ءِ، خواوہ کہ جندی وڑاٹ چین خاص وڑاٹ ووہان آکاو و تینا ایڑ ھ و ایلم تتون ملیو۔ پاکستان اٹی چین نا سفیر نا کنڈآن وزیراعظم نا خصوصی کمکار زلفی بخاری ءِ چین نا سفر ءِ کپننگ نا مشورہ تننگا۔ چین نا سفیر پارے کہ چین اٹی ساڑی پاکستانیک ننامہمانک ءُ ہرافتا رکھ و خیال ءِ تخنگ آ خصوصی چکار کننگ اُن۔ تینا پاکستانی ایلم تا خیال ءِ تخنگ کن ہر حد اسکان کانہ۔ اوپارے کہ حکومت پاکستان و چین اٹی ساڑی پاکستانی شاریک آزمائش نا دا ساہت اٹی چینی قوم اتون پبی تفیر، جامع و خصوصی گام گیج آتا سوب آن کرونا وائرس نا برخلاف مدافعت اٹی سرسہبی ملنگ ءِ۔ یاؤ جنگ پارے کہ زوت دا مشکل آن چٹنہ و حالیت آک مست انا وڑ پدی مریرہ، زوت وزیراعظم نا خصوصی کمکار تون ایلو حکومتی زعماء تا چین اٹی خیر مقدم ءِ کینہ۔
