ہری پور۔ 10 فروری (اے پی پی) بنجائی وزیر توانائی و قدرتی وسیلہ عمر ایوب خان پارینے کہ عمران خان تون چٹان آنبار سلوک اُن، تحریک انصاف نا حکومت گونڈ ءُ وخت اسے ٹی ملک آن لوڈشیڈنگ، بجلی ٹرپنگ تون اوار کنڈاکلچر ءِ چٹفینے، 85 ہزار خلقت نا برخلاف ایف آئی آر درج کرسا 8 ہزار بندغ ءِ دزگیر کننگا، بجلی دُزی آتا ہچ ءُ جنس اس مفک، دُز دُز مریک و او ہچ ءُ رعایت اسے نا حقدار مفک، تحریک انصاف نا حکومت ملک انا شونداری تون اوار لس بندغ نا شونہالی ءِ خواہک۔ او تدوک آ دے جی ایس او ٹریننگ سینٹر صوبڑاسٹی ٹی گرین پاکستان نا بابت اڈ ہلوک آ دود آن تران کریکہ۔ بنجائی وزیر نیال اس خلسا شجر کاری مہم 2020ء نا بناءِ کرے۔ داوخت آ باسک صوبائی اسمبلی فیصل زمان جہازوں والا، چیف انجینئر بدردین سولنگی، پرنسپل شعیب تون اوار میڈیا نا نمائندہ غاک ہم ساڑی ئسر۔ اوپارے کہ اڑزان بجلی جوڑ کننگ ننا حکومت نا اولیت ءِ، تدوک آ حکومت کبین ءُ بجلی جوڑ کرسا الس آ ودکی بھاریم اس شاغا، 70 درسد بجلی تیل آن جوڑ کننگاکہ وخت اس کہ ننا حکومت اڑزان بجلی جوڑ کننگ کن چندی کمپنی تتون معاہدہ کرینے ہرا پاکستان اٹی تینا پلانٹ خلسا اڑزان بجلی ودی کیک ہراڑان نیزگار الس ءِ آسراتی دوبریک۔ عمر ایوب خان پارے کہ جی ایس او ٹریننگ سنٹر ءِ پین فعال کننگک و دانا اخس کہ مون تروک ویل آک ءُ اوفتے دمدستی وڑاٹ ایسر کننگ تون اوار 20 درسد الاؤنس ہم تننگک۔ پرنسپل شعیب بنجائی وزیر و غٹ مہمان تا منت واری ءِ ہرفے۔ داوخت آ سٹیج سیکرٹری نا فرض ءِ اختر جاوید ادا کرے۔
