اسلام آباد ۔ 8 فروری (اے پی پی) وزیر ءِ درئی کار مخدوم شاہ محمود قریشی ءَ گوں زرّباری کوریا ءِ واستہ پاکستان ءِ نامینتگیں سفیر ممتاز ھرا بلوچ ءَ شمبے ءَ وزارت ءِ درئی کار ءَ گوں گند ءُُ نند کت ۔ وزیر ِ درئی کار ءَ زرّباری کوریا ءَ پاکستان ءِ سفیر ءِ بستار ءَ پوسٹ بوھگ ءِ پد ءَ آرا مبارکی دات ءُُ گوشت کہ تئی پوسٹنگ ھما وھد ءَ بوھگ ءَ انت کہ اے وھد ءَ پاکستان سفارتی کشاں چیل آں گوں دیم پہ دیم انت ۔ وزیر ءِ درئی کار ءَ نامینتگیں سفیر ءَ را پاکستان ءِ درئی پالیشی آنی رد ءَ پاکستان مردم آں گوں جوانی ءَ کمک کنگ ءُُ آوانی جیڈھ آناں زوتیں رنگ ءَ گیوار کنگ ءِ پنت ءُُ شون کت ۔ وزیر ءِ درئی کار ءَ ممتاز ھرا بلوچ ءَ را پاکستان ءُُ جنوبی کوریا ءِ نیام ءَ دو نیمگی تجارتی ءُُ اقتصادی یکوئی آناں گیش برجم کنگ ءِ واستہ وتی کوشست آناں کارمرد کنگ ءِ پنت ءُُ شون ھم کت ۔
