وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان نا میر پور اٹی میڈیا تون گپ و تران

میر پور ۔ 06 فروری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ پاکستان نا حکومت و الس بھارتی جبر و استبداد و ظلم آن پد ہم تینا عزم و جوزہ حریت آ سلوک کشمیری تے سلام پیش کیرہ و باوری کرفرہ کہ نن اوفتے تون سلنہ ۔ وزیراعظم عمران خان کشمیر ی تا سفیر نا حیثیت اٹ اینو کشمیری الس ءِ یکجہتی نا کلہو و دنیا ءِ اونا وعدہ غاتے یات ترفنگ کن میر پور آ بننگ ءِ ۔ بھارت ظلم و جور اٹ کشمیری تا ہن و بر آ تو پابندی خلنگ کیک ولے اوفتا سوچ و جوزہ ءِ توننگ کپک ، وزیراعظم عمران خان نا کماشی ٹی مچ آ پاکستانی قوم کشمیری تا روا بنداوی، آئینی و کانودی حق اکن ہر حد اسکان کارہ ۔ داخیال آتا درشانی ءِ او پنچ شنبے نادے آ میر پور آ بننگ و عظیم الشان جلسہ نا بست و بند آتا جاچ ءِ ہلنگ نا وخت آ میڈیا تون گپ وتران کرسا کرے ۔ سینیٹ نا قائمہ کمیٹی حوالکاری و شین کاری نا چیئرمین سینیٹر فیصل جاوید و مسکوہی وزیراعظم آزاد کشمیر و تحریک انصاف آزاد کشمیر نا صدر بیرسٹر سلطان محمود چوہدری ئسک ہم اوڑتون اوار ئسر ۔ داوخت آ سینیٹر فیصل جاوید پارے کہ وزیراعظم عمران خان سہی وڑاٹ کشمیری تا سفیر ءِ و او دنیا نا ہر فورم آ کشمیر نا مقدمہ ءِ جیرت و نرزوری اتون کرینے ۔ اوپارے کہ کشمیر نا آجوئی کشمیری تا مقدر ءِ، عمران خان کشمیری تتون سلوک ءِ و سلک ۔ اوپارے کہ وزیراعظم عمران خان نا میر پور جلسہ نا مسخت کشمیری تے کلہو تروئی ءِ کہ پاکستانی قوم دروہم اوفتے تون سلوک ئسر و اینو ہم سلوک ءُ و مدام اوفتا کاز انا مخ تفی ءِ کرسا کیرہ ۔ سینیٹر فیصل جاوید پارے کہ کشمیر کاز ءِ ہراوڑ مون آ دروئی ءِ دا لاءحہ عمل نا پڑو کن وزیراعظم عمران خان میر پور آ بننگ ءِ ۔ خصوصی کمکار حوالکاری و شین کاری پارے کہ کشمیر نا الس و وزیراعظم آزاد کشمیر تون اوار اینو وزیراعظم عمران خان قومی بیانیہ ءِ مون آ دننگ کن ہِننگ ءِ کہ ہراوڑننے کشمیر نا ویل ءِ مون آ دروئی ءِ ۔