میرپور ۔ 06 فروری (اے پی پی) وزیر خارجہ شاہ محمود قریشی پارینے کہ حق خودارادیت نا دوئی کننگ اسکان کشمیری الس نا مخ تفی ءِ برجاتخنہ ، مودی حکومت متنازعہ کانود و ظلم و جور اٹ کشمیری الس نا جہد نا جوزہ ءِ یخ کننگ کپک ۔ وزارت خارجہ ہرمحاذ و غٹ جہانی کہول آ کشمیری الس نا وکالت ءِ کرسا کیک ۔ پنچ شنبے نادے آ میر پور اٹی یکجہتی کشمیر ریلی آن تران کرسا وزیر خارجہ پارے کہ بھارت تدوک آ کیہی تُوآن مقبوضہ کشمیر ءِ دنیا نا بھلا جیل اٹ بدل کرینے، مواصلات و میڈیا غا پابندی تا سوب آن مقبوضہ کشمیر نا دنیا غان رابطہ کاٹ ءِ و ہموڑے خور و دوائی تا بھاز کاختی ءِ ۔ اوپارے کہ بھارتی حکومت تدوک آ 72سال آن کشمیری تے شیف خلنگ کتو و کشمیری الس نریندر مودی نا گام گیج آتے وخت اس ہم امنا کپسہ ۔ شاہ محمود قریشی پارے کہ مودی حکومت متنازعہ کانود و ظلم وجور اٹ کشمیری الس نا جہد نا جوزہ ءِ یخ کننگ کپک، اوپارے کہ آزاد کشمیر و پاکستان نا چناچنا مقبوضہ کشمیر نا مظلوم ایڑھ ایلم تتون ہم کوپہ ءُ ۔ اوپارے کہ اینو میر پور نا خلقت ثابت کرے کہ پاکستان و کشمیریک اسہ جان اِرا است ءُ ۔ اوپارے کہ پاکستانی وزارت خارجہ ہر محاذ و غٹ جہانی کہول آ کشمیری الس نا وکالت ءِ کرسا کیک ۔ اوپارے کہ حق خودارادیت نا دوئی کننگ اسکان کشمیری تا مخ تفی ءِ برجاتخنہ ۔
