قوم تا جوڑ کننگ اٹ مثبت سوچ، ڈٹ بندی و وسیلہ غاتا سہی کاریم اٹ اتنگ المی ءِ، صدر مملکت ڈاکٹر عارف علوی نا ’’قومی غذائی کانفرنس‘‘ آن تران

اسلام آباد ۔ 06فروری (اے پی پی) صدر مملکت ڈاکٹر عارف علوی چناتے ٹی غذائی کاختی نا مون ءِ توننگ و آبادی ٹی ودکی نا توننگ نا گرج انا اہمیت ءِ تالان کرسا پارے کہ قوم تا جوڑ کننگ اٹ مثبت سوچ، ڈٹ بندی و وسیلہ غاتا سہی کاریم اٹ اتنگ المی ءِ، ملک اٹی چناتا بھلو کچ اس غذائی کاختی نا گواچی ءُ ، چناتا آخبت ءِ رکھ کننگ کن جامع پالیسی سازی نا گرج ءِ ، ملک ءِ جان جوڑ و شونہال کننگ کن نن بایدے زمواری نا درشانی ءِ کین ، میڈیا راج اٹی راجی برائی تا بابت آگاہی ودی کننگ کن تینا کڑد ءِ ادا کے ۔ داخیال آتا درشانی ءِ او پنچ شنبے نادے آ داڑے ’’قومی غذائی کانفرنس‘‘ آن تران کرسا کرے ۔ اوپارے کہ ملک اٹی بھلو کچ اسے ٹی چناتے غذائی کاختی نا مون تروک ءِ ، 29 درسد چناک درکار وزن آن کم ءُ وخت اس کہ 10 درسد چناتا وزن مقرر ہ آب آن زیات ءِ ، 54درسد چناک دتر نا کمتی و 63درسد چناک وٹامن ڈی انا کمتی نا شکار ءُ ، ننے تینا رہن سہن نا جاچ ءِ ہلوئی مریک ۔ صدر مملکت پارے کہ وزیراعظم عمران خان تینا راجی زند اٹی جان جوڑی نا بشخ اٹی پبی کاریم کرینے، الس ءِ آسراتی فراوان کننگ کن او شوکت خانم کینسر ہسپتال اس جوڑ کرے، عمران خان وزیراعظم گچین مننگ آن پد تینا اولیکو تقریر اٹی جان جوڑی نا ویل آتے تالان کرسا قوم ءِ آگاہی تس ۔ صدر مملکت پارے کہ پاکستان اٹی بھارت نا مقابلہ ٹی نیزگاری کم ءِ ۔ اوپارے کہ مہالولمہ غاک تینا چناتے تینا پال تے کنفیرہ ولے ولدا ڈبی والا پال تا سوب آن لمہ غاتا تینا چناتے پال کنفنگ اٹ کمتی بس، ڈبی والا پالک لمہ نا پال تا ہچ ءُ جاگہ اس ہلنگ کپسہ، قرآن پاک اٹی ہم خدی آ چناتے اِراسال اسکان لمہ نا پال کنفنگ نا پرمان تننگانے ۔ اوپارے کہ ملک ءِ آبادی نا بھلو ویل اس مون تروک ءِ ، خور انا کمتی و زچہ وبچہ نا جان جوڑی نا رداٹ چناتا ودی کننگ اٹ وقفہ ضروری ءِ ، بدبختی اٹ ملک اٹی چندی تپہ غاتے ٹی غذائی کاختی ءِ، لمہ نا پال تیٹی خدی آ چناتے کن غٹ اجزاک اریر ۔