وزیراعظم عمران خان نا میر پور اٹی یکجہتی کشمیر ریلی آن تران

میرپور ۔ 06فروری(اے پی پی) وزیراعظم عمران خان بھارتی وزیراعظم نریندرمودی ءِ مخاطب کرسا پارے کہ مودی غلط فہمی سے ٹی مفیس، پاکستان آ جلہو نا آخیریکو غلطی مریک، پاکستان اٹی کہینگ آن اسٹ اس ہم خلیپک، نن اللہ غا ایمان تخنہ، مقبوضہ کشمیر اٹی کرفیو زیات ہرے اسکان سلپک، ہرادے کرفیو چٹا انسان تا سمندر آجوئی نا توار مرسا پیش تمک و مودی نا دوٹی ہچ اس سلپک، پاکستان جنگ آخا پرامن وڑاٹ ویل آتا ایسری نا خواہندار ءِ، اینو مچ آ دنیا مقبوضہ کشمیر نا الس نا حالیت آتیان معلومدار ءُ، کشمیر نا ویل جہانی کہول آ اہمیت اختیار کرینے ۔ داخیال آتا درشانی ءِ او پنچ شنبے نادے آ داڑے یکجہتی کشمیر ریلی آن تران کرسا کرے ۔ دود اٹی وزیراعظم آزاد جموں و کشمیر راجا فاروق حیدر خان، وزیر خارجہ شاہ محمود قریشی ، بنجائی وزیر امور کشمیر علی امین گنڈاپور، وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان ، پارلیمنٹ نا کشمیر کمیٹی نا چیئرمین سید فخر امام ، سینیٹ نا قائمہ کمیٹی حوالکاری و شین کاری نا چیئرمین سینیٹر فیصل جاوید، تحریک انصاف آزاد جموں و کشمیر نا صدر بیرسٹر سلطان محمود چوہدری ، حریت راہشون سید عبداللہ گیلانی ئسک ہم ساڑی ئسر ۔ وزیراعظم پارے کہ مقبوضہ کشمیر اٹی 80 لکھ خلقت 5 اگست آن پد مشکل انگا حالیت آتیان گدرینگ انگ ءُ ۔ اوپارے کہ اینو دا جلسہ نا مسخت اوفتے کلہو تروئی ءِ کہ بیرہ آزاد کشمیر آخا مچ آپاکستانی قوم مقبوضہ کشمیر نا الس تون تفوک ءُ ۔ مشکل وخت اٹی صبر کروک آ اللہ تعالیٰ ءِ بھاز پسند ءِ ۔ اللہ تعالیٰ فرماءفک کہ او ہر مشکل وخت آن پد آسانی عطاکیک ۔ اوپارے کہ مقبوضہ کشمیر نا الس کن جوان ءُ وخت اس بننگ والا ءِ، 5 اگست نا نریندر مودی نا تکبر آ ہرفوک آ گام کشمیری تا آجوئی نا کسر ءِ آوار کرے، ایمان ءِ کہ مقبوضہ کشمیر ءِ آجو مننگ آن داسہ ہچ کس توننگ کپک ۔ 5 اگست آن مست دنیا کشمیر ءِ گیرام کریسس و ہچ کس اونا پن ءِ اَلتوکہ ولے تدوک آ 6تُو اٹی کشمیر نا ویل جہانی اہمیت اختیار کرینے، بھارت نا موقف مسوسس کہ مقبوضہ کشمیر پاکستان و بھارت نا ہڑتوم آ کنڈآتا ویل ءِ ۔ اوپارے کہ نریندر مودی تینا مچ آ گچین کاری مہم اٹی پاکستان ءِ تنقید نا نشانہ کرے، بھارت بالاکوٹ اٹی ننا درخت ءِ شہید کرسا ننا سد آ بندغ آتے خلنگ نا دعویٰ کرے ولے نن بھارت نا جہاز ءِ بِٹنگ آن پد اونا پائلٹ ءِ انسانی ہمدردی نا خاطر پدی تسن، مودی نا غٹ گچین کاری مہم پاکستان نا مخالف جوزہ غاتیاتالان ئسر، خار تروک آڑان امن نا اومیت تخنگ مفک ۔ وزیراعظم پارے کہ اینو پاکستان دنیا ٹی ویل آتے ایسر کرفنگ کن کوشست کننگ ءِ، ایران و سعودی عرب نا نیام اٹ جنگ ءِ تورفنگ و بے چیٹی تیٹی کمتی اتنگ کن پورو کوشست کرین، اوغانستان اٹی پائیدار امن کن پاکستان پورو خلوص اتون کوشست کننگ ءِ ، پاکستان اسہ پرامن ءُ ملک اسے ، اوپارے کہ بھارتی وزیراعظم نریندرمودی الیکشن اٹی سرسہبی آن پد آر ایس ایس نا انتہاپسندی نا نظریہ ءِ مون آ درینے ۔ وزیراعظم پارے کہ ای وعدہ کریسٹ کہ کشمیر نا سفیر مریوہ، پنچ اگست آن پد ہر فورم آ کشمیر نا ویل ءِ چست کریٹ، امریکہ، برطانیہ ، جرمنی ، کینیڈا ، فرانس نا سروک و روس انا وزیر خارجہ تون کشمیر نا ویل آ ہیت وگپ کریٹ ۔ 6 تُو اٹی اقوام متحدہ نا سلامتی کونسل اٹی کشمیر نا ویل 3 وار زیر بحث بس، یک و نیم سد امریکی و برطانوی پارلیمنٹ نا باسک کشمیر نا ویل ءِ چست کریر، یورپی یونین نا 600 پارلیمنٹ نا باسک بھارت آن خواست کرینو کہ مقبوضہ کشمیر آن کرفیو ءِ ہرفے، مواصلاتی نظام ءِ بحال کے و کشمیری راہشون آتے یلہ کننگے ۔