مظفر آباد۔ 05 فروری (اے پی پی) وزیراعظم عمران خان تون سید عبداللہ گیلانی و سید فیض نقشبندی نا کماشی ٹی آل پارٹیز حریت کانفرنس نا ڈل مظفر آباد اٹی اوڑدہی کریر۔ ڈل اٹی عبدالمجید ملک، سید اعجاز رحمانی، شیخ محمد یعقوب، عبدالمجید میر، شیخ عبدالمتین وجاوید اقبال بٹ ئسک اوار ئسر۔ داوخت آ وزیر خارجہ مخدوم شاہ محمود قریشی، بنجائی وزیر امور کشمیر علی امین گنڈاپور، کشمیر کمیٹی نا چیئرمین سید فخر امام، وزیر اعظم آزا د جموں و کشمیر فاروق حیدر و اسپیکر آزاد جموں کشمیر کانود ساز اسمبلی ئسک ہم اوڑدہی ٹی ساڑی ئسر۔ حریت کانفرنس نا ڈل مقبوضہ جموں و کشمیر نا ساڑی حالیت، بھارت سرکار نا کنڈآن جابرانہ و اسہ کنڈی گام گیج، غیر انسانی لاک ڈاؤن و مواصلاتی ناکہ بندی، بھارتی کوزہ گر فوجانا ظلم و ستم و بنداوی انسانی حق آتا لتاڑ نا حالیت آتے جہانی کہول آ تالان کننگ کن حکومت پاکستان و بطور خاص وزیراعظم عمران خان نا جندی کوشست آتے پبی خراج تحسین پیش کریر۔ ڈل کشمیر نا ویل ءِ جہانی کہول آ پین تالان کننگ نا بابت وزیراعظم عمران خان ءِ سلاہ پیش کریر۔ ڈل اٹی بشخ ہلوک آک پاریر کہ ہرا گچین وڑاٹ وزیراعظم پاکستان مظلوم کشمیری تا توار مسنے مچ آ کشمیری قوم وزیراعظم نا منت وار ءُ۔ ڈل پارے کہ مقبوضہ کشمیر نا الس وزیراعظم عمران خان نا جند اتون خاص مہر و مریبت تخرہ و اونا پن انا نعرہ خلیرہ۔ کشمیری ہراتم شہید مریک تو پاکستان نا بیرک اٹ دفن مننگ خواہک۔ وزیراعظم عمران خان پارے کہ نہہ لکھ کوز ہ گر فوج و ریاستی جبر اٹ کشمیری تا توار ءِ توننگ مفک۔ آرایس ایس نا فلسفہ غا عمل کرسا بھارتی سرکار نا فاشٹ دروشم دنیا نا مون آ پاش مسنے۔ وزیراعظم عمران خان دا عزم انا درشانی ءِ کرے کہ ہر کہول و ہر فورم آ کشمیری تا توار ءِ بڑز کرسا کیوہ، ظلم و ستم آن زہمی مظلوم چنا، ورنا و زالبول آتا توارک جہانی ضمیر ءِ سرفنگ ءُ، کشمیری تے حق خودارادیت ملنگ اسکان پاکستان ہر محاذ آ کشمیری تا اخلاقی، سفارتی و سیاسی مخ تفی ءِ برجاتخک۔
