کوئٹہ۔ 05 فروری (اے پی پی) وزیراعلیٰ بلوچستان جام کمال خان پارینے کہ مقبوضہ کشمیر اٹی بھارت ہراحکومت نا وڑ ءِ تینا کرینے او ریاستی دہشت گردی اسے، بی جے پی نا حکومت نا بنداو تنگ نظری نا پالیسی آٹے و بھارت مسلمان و ایلو اقلیت آتون ظلم و جور انا رویہ تخانے، تخلیق پاکستان نا وخت آ گڑاس دانشور و سیاسی سرکڑدہ بھارت تون رہینگ انگ نا تصور ءِ تالان کرسا ہمووخت انا خلقت ءِ ہندن ءُ عکس اس پیش کریسر کہ مسلمان تیکن جتا مملکت اس جوڑ کننگ المی اف ولے اینو 73 سال تدینگ انگ آن پد حقیقت مون آ بسنے کہ برصغیر نا مسلمان تیکن اسہ جتا ءُ ریاست اس جوڑ کننگ انت اکن المی ئس، اینو بھارت نا بیست کروڑ مسلمان تیکن سوج ہرفنگانے کہ انت او ساڑی حالیت آتے ٹی بھارت تون رہینگ انگ کیرہ۔ داخیال آتا درشانی ءِ او یوم یکجہتی کشمیر نا بابت محکمہ یوتھ افیئرز نا کنڈآن اڈ ہلوک اسہ پروقار دود اسے آن تران کرسا کرے۔ گورنر بلوچستان جسٹس (ر) امان اللہ خان یاسین زئی، سلاہکار گوازی عبدالخالق ہزارہ و پارلیمانی سیکرٹری دنیش کمار ئسک ہم دود آن تران کریر، وزیراعلیٰ تینا تران اٹی پارے کہ امن، جمہوریت و سیکولرازم نا دعویدار بی جے پی حکومت نا اصل دروشم دنیا نا مون آ بسنے، ہندوستان نا ایلو جماعت آک شاید دا سوچ تخپرور ہرا بی جے پی نا حکومت اینو مسلمان و بھارت اٹی رہینگوک آ ایلو اقلیت آتون متعصبانہ سلوک کننگ ءِ، مچ آ دنیا نا انسانی حق انا تنظیمک ہم بی جے پی نا دروشم ءِ پاش کرینو، اوپارے کہ بھارتی پارلیمنٹ نا انسانی حق انا پامالی نا قرارداد نا نتیجہ ءِ بھارت ءِ بھگتوئی تمک انتئے کہ اینو مچ آ دنیا ٹی بھارتی سوچ و رویہ نا برخلاف توار چست مننگ ءِ، وزیراعلیٰ پارے کہ پاکستان اٹی آباد اقلیت آتے اسہ وڑ حق دوئی ءِ و او پاکستان اٹی مذہبی آجوئی تون است جم زند اس تیر کننگ ءُ، اوپارے کہ بحیثیت مسلمان و پاکستانی مننگ نا ناطہ دا ننا زمواری ءِ کہ حق اتون تفن و تینا مظلوم کشمیری ایلم تا توار ءِ دنیا اسکان سرکین۔ ہراوڑ نن 14 اگست و ایلو قومی تہوار ءِ اڈ ایتنہ ہمووڑ جوش وجوزہ اتون یوم یکجہتی کشمیر ءِ ہم اڈتننگ اُن، نن تینا کشمیری ایلم تتون ئسن و مدام مرینہ و کشمیر کاز ءِ مون آ تخنہ، وزیراعلیٰ پارے کہ بلوچستان ہمیشہ کشمیری تتون یکجہتی نا درشانی ءِ کرسا توار بلند کرینے و تینا جوزہ غاتے دنیا اسکان سرکرینے، اوپارے کہ تدوک آ سال اوبلوچستان نا غٹ جماعت آتا راہشون آتون اوار کشمیر آ ہنسا بلوچستان نا جوزہ و احساس آتے کشمیر ی الس اسکان سرکرے ہرافتے کشمیری الس قدر انا نظر اٹ ہریرہ۔ داوخت آ اسکول نا چناتا کنڈآن کشمیر نا تحریک آجوئی آ مبنی ٹیبلو و قومی نغمہ پیش کننگا، حریت کانفرنس نا راہشون زاہد صفی خصوصی وڑاٹ دود اٹی بشخ ہلک وخت اس کہ کشمیری الس، چناو زند انا چندی بشخ آتیان تعلق تخوک آ بندغ آک دود اٹی ساڑی ئسر۔
