یوم یکجہتی کشمیر ءِ اڈتننگ نا مسخت تینا کشمیری ایلم تا جہد آجوئی نا پورو مخ تفی ءِ کننگ نا ءِ، گورنر بلوچستان امان اللہ خان یاسین زئی

کوئٹہ۔ 05 فروری (اے پی پی) گورنر بلوچستان امان اللہ خان یاسین زئی پارینے کہ یوم یکجہتی کشمیر ءِ اڈتننگ نا مسخت تینا کشمیری ایلم تا جہد آجوئی نا پورو مخ تفی ءِ کننگ نا ءِ۔ اوپارے کہ اینو مچ آ دنیا غا پیدوار مسنے کہ اقوام متحدہ نا قرارداد آتے مون آ تخسا مقبوضہ کشمیر نا الس ءِ حق خودارادیت تننگے تانکہ او تینا قسمت نا فیصلہ ءِ تینٹ کننگ کیر۔ داخیال آتا درشانی ءِ او یوم یکجہتی کشمیر نا مناسبت اٹ اڈ ہلوک آ دود بعنوان کشمیر مریک پاکستان نا بشخ ہلوک آتیان تران کرسا کرے۔ داوخت آ وزیراعلیٰ بلوچستان جام کمال خان، صوبائی وزیر عبدالخالق ہزارہ، سردار یار محمد رند، قومی و صوبائی اسمبلی نا باسک آتون اوار زند انا چندی بشخ آتیان تعلق تخوک آ بندغ آک ساڑی ئسر۔ یوم کشمیر نا بابت اڈ ہلوک آ دود اٹی بشخ ہلوک آتیا ن تران کرسا گورنر بلوچستان پارے کہ ننا کشمیری ایلمک اسہ بھلو وخت اسے آن تینا حق خودارادیت نا دوئی کننگ کن جہد کننگ ءُ۔ اوفتا دا جہد ءِ توننگ کن اوفتیا ہروڑنا ظلم کننگ انگ ءِ ولے اوکان پد ہم بے کچ صبر و سگ اتون او مصیبت و آلام تا مقابلہ ءِ کرسا تینا حق انا دوئی کننگ کن جہد کننگ ءُ و ہندا مسخت کن کشمیریک بے شمار جانی ومالی قربانی تننگ ءُ۔ گورنر بلوچستان پارے کہ پاکستان مدام ہر فورم آ تینا کشمیری ایلم تا روا موقف نا نئے بیرہ مخ تفی ءِ کرینے بلکن اوفتے تون مروک آ ظلم و بیدادی ءِ جہانی کہول آ تالان ہم کننگ ءِ۔ گورنر بلوچستان امان اللہ یاسین زئی پارے کہ مقبوضہ کشمیر آ بھارت نا پورو کوزہ و بھارتی آئین نا آرٹیکل 370 و 35A انا منسوخ غٹ کانود و قدر آتا خلاف ورزی ءِ کرسا تینا وحیشی و غیر جمہوری چہرہ ءِ بے نقاب کرے۔ گورنر بلوچستان پارے کہ دا ہیت پیدوار ءِ کہ مودی فاشٹ پالیسی کشمیری تا جہد آجوئی ءِ توننگ کپک۔ ہنداخاطرآن المی ءِ کہ جہانی برادری نا چکار کشمیر نا چرجوئی نا کنڈا کرفنگے و جہانی سلا ہ ءِ اوفتا حق اٹ استوار کننگے۔ اوپارے کہ بلوچستان نا غیور الس مصیبت نا ہر ساہت اٹی تینا کشمیری ایلم تتون تفوک ءُ۔ دا چرجوئی ٹی سیاسی پارٹی و راہشون تا کوشست آک ستاکڑزرہ۔ گورنر بلوچستان ایسر اٹ یوم یکجہتی کشمیر نا بابت اڈ ہلوک آ دود انا منتظمین و بشخ ہلوک آتے خراج عقیدت پیش کرے۔