اسلام آباد۔ 05 فروری (اے پی پی) وزیراعظم عمران خان پارینے کہ اینو نا دے یوم یکجہتی کشمیر نا وڑاٹ اڈتننگ نان کنڈآن تینا ہمو کشمیری ایلم و ایڑھ تتون پورو مخ تفی نا درشانی ءِ ہرافتے شش تُو آن غیر انسانی حراست و مواصلاتی ناکہ بندی نا شست کننگ انگ ءِ، داخس مرغن رکھ انا تاریخ اٹ مٹ رسینگپک، پن نا بھارتی جمہوریت نا فسانہ و اونا کنڈآن بنداوی انسانی قدر آتا لتاڑ نا پت ءِ پاش کرینے، بھارت مقبوضہ کشمیر اٹی نہہ لکھ آن زیات کوزہ گر فوج آن ہشتاد لکھ کشمیری تے اوفتا تینا ہی گل زمین آ قید کرینے، داوڑانا ڈکھیائی و بنداوی حق انا پامالی نا تاریخ اٹی کم مثال ملک، جہانی برادری کشمیری تا بنداوی انسانی حق و اوفتا آجوئی نا رکھ ءِ پک کننگ و بھارت نا جارحانہ و جنگوڑوی گام گیج آتیان امن ءِ مون تروک خطرہ غاتا توننگ کن تینا کڑد ءِ ادا کے۔ داخیال آتا درشانی ءِ او یوم یکجہتی کشمیر نا وخت آ تینا کلہو اٹی کرے۔ وزیراعظم پارے کہ کشمیری، مسلم امہ، پاکستان و جہانی برادری بھارت نا کنڈآن انصاف و کانود نا پامالی نا عمل ءِ رد کرینو، بھارت مقبوضہ کشمیر اٹی نہہ لکھ آن زیات کوزہ گر فوج آن ہشتاد لکھ کشمیری تے اوفتا تینا ہی گل زمین آ قید کرینے، داوڑنا ڈکھیائی و بنداوی حق آتا لتاڑنگ نا تاریخ اٹی کم مثال ملک، ہزار آ بے گناہ تے جبری حراست نا گواچی وخت اس کہ ہزار آ ورناتے غیب کرسا نادرست ہند آتیا بند کننگانے، داریاستی دہشت گردی نا حقی درشانی ءِ، جہانی برادری، انسانی حق انا تنظیمک و جہانی میڈیا بھارت نا دا ناقابل قبول کارروائی تا امنائی وڑاٹ مذمت ءِ کننگ ءِ۔ وزیراعظم عمران خان پارے کہ بھارت اینو دنیا نا مون آ استبدادی و جابرانہ ریاست نا وڑاٹ سلوک ءِ ہرا کشمیری تا بنداوی حق و آجوئی ءِ سلب کرینے، پاکستان خواست کیک کہ فوجی گھیڑ و مواصلاتی بلیک آؤٹ ءِ دمدستی چٹفنگے و بھارت نا غیر کانودی و اسہ کنڈی گام گیج ءِ پدی ہلنگے، داکان بیدس ناروا وڑاٹ غیر کانودی دزگیر کروک آ غٹ بندغ آتے یلہ وخت اس کہ او غٹ مون انگا کانود کہ ہرافک کوزہ گر فوج آتے بے لگام کرینے، دمدستی وڑاٹ کالعدم گوندنگے۔ وزیراعظم پارے کہ جہانی کہول آ انسانی حق و انسانیت کن کاریم کروک آ تنظیم بشمول جہانی میڈیا ءِ مقبوضہ علاقہ ٹی انسانی حق انا حالیت آتا جاچ ءِ ہلنگ نا موکل تننگے، نن جہانی برادری آن خواست کینہ کہ او کشمیری تا بنداوی انسانی حق و اوفتا آجوئی نا رکھ ءِ پک کننگ و بھارت نا کنڈآن جارحانہ و جنگوڑوی گام گیج آتا سوب آن جہانی امن ءِ مون تروک خطرہ غاتا توننگ اٹ تینا کڑد ءِ ادا کے۔ اوپارے کہ نن مقبوضہ جموں و کشمیر نا الس تون تینا بدل مفروک یکجہتی نا درشانی ءِ کینہ و باوری کرفینہ کہ پاکستان اوفتے تون کوپہ تون کوپہ ملائفسا سلک۔ پاکستان ہمو وخت اسکان تینا پورو اخلاقی و سفارتی مخ تفی ءِ برجاتخک ہراوخت اسکان کشمیری الس اقوام متحدہ نا سلامتی کونسل نا قرارداد آتا رداٹ حق خودارادیت دوئی کپسہ۔
