اسلام آباد۔ 05 فروری (اے پی پی) پاکستان و ملائیشیا نا وزیراعظم آک ہڑتوم آ ملک آتا نیام اٹ تزویراتی شریداری نا ہڑتوم آ کنڈآتا کمکاری ءِ پوسکن آ کہول اسکان دننگ آ امنا کرسا کشمیر فلسطین و روہنگیا نا جھیڑہ غاتے اقوام متحدہ نا سلامتی کونسل و جنرل اسمبلی نا قرارداد آتا رداٹ ایسر کننگ نا گرج آ زور شاغانو وخت اس کہ مسلم امہ نا راجی، سیاسی و اقتصادی حالیت آتا گچینی و اسلام نا حقی قدر انا مون آ دننگ کن ترکی تون اواری اٹ پبی کڑد ادا کننگ نا عزم انا درشانی ءِ کرینو، مسلم اقلیت آتا حق و اسلامو فوبیا تون اوار مسلم امہ ءِ مون تروک اسیجا چیلنج آتا ایسری کن اجتماعی کوشست آتے ودفنگ آ ہم امنا کرینو۔ وزیراعظم عمران خان نا ملائیشیا نا صدر مہاتیر محمد نا سلہ غاملائیشیا نا اِرادے ئی دورہ نا ایسر آ جاری اسیجا اعلامیہ ٹی پاننگانے کہ وزیراعظم عمران خان نا ملائیشیا نا ارٹ میکو سرکاری دورہ پاکستان و ملائیشیا نا نیام اٹ بے مثل تزویراتی شریداری ءِ پین سسوگو کننگ نا عزم انا درشانی ءِ۔ وزیراعظم نا دورہ نا وخت آ اونا جم و جوش اٹ خیرمقدم ءِ کننگا و ملائیشیا نا وزیراعظم پتراجایا آفس اٹی اونا خیرمقدم ءِ کرے۔ دورہ نا وخت آ ون آن ون و ڈل آتا کہول آ اوڑدہی تیٹی ہڑتوم آ راہشونک ملائیشیا و پاکستان نا تزویراتی شریداری نا کہول آ تاریخی تعلقداری آ سجفسا تین پہ تینی پت و گرم جوشی و نیک است خواہی تتون پین سوگو کننگ نا عزم انا درشانی ءِ کننگا۔ ہڑتوم آ راہشونک چندی بشخ آتے ٹی ہڑتوم آ ملک آتا نیام اٹ ہڑتوم آ کنڈآتا تعلقداری تے پوسکن آ کہول آ دننگ و پین ہیت وگپ و کمکاری ءِ ودفنگ آ امنا کریر۔ ہڑتوم آ راہشونک بڑزکو کہول آ ہڑتوم آ کنڈآتا رابطہ غاتے باقاعدگی اتون برقرار تخنگ و اوفتے ٹی تسلسل، ڈل آتا دوستانہ ہن و بر و غٹ بشخ آتے ٹی کمکاری ءِ ودفنگ آ امنا کریر۔ ہڑتوم آ راہشونک تین پہ تینی است خواہی ہڑتوم آ کنڈآتا علاقائی و جہانی باندات آتیا بھرمی و وسیع البنیاد کہول آ گپ و تران کریر۔ ہڑتوم آ راہشونک غٹ کہول آتیا تین پہ تینی تعلقداری تے پین مون آ دننگ و گہرائی آ امنا کریر۔ خاص وڑاٹ 21نومبر 2018 ء و 22مارچ 2019 ء آ مشترکہ اعلامیہ ٹی ہرا بشخ آتا پیدواری ءِ کننگاسس، اوفتے پین مون آ دننگ آ امنا کریر۔ ہڑتوم آ راہشونک سیل و سوات نا بشخ اٹی وسیع لائخی تا رداٹ ہڑتوم آ کنڈآتا کمکاری ءِ پین سوگو کننگ و سیل و سوات و میزبانی نا بشخ اٹی زرکاری نا است بڈی آ زور شاغار۔ اعلامیہ ٹی پاننگانے کہ ملائیشیا و پاکستان تعلیمی تعلقداری تے پین ودفنگ و دارداٹ تدوک آ سال ملائیشیا نا چندی یونیورسٹی تا ڈل آتا پاکستانی جامعہ غاتون ممکنہ کمکاری کن پاکستان نا دورہ نا ستاءِ کریر۔ اعلامیہ ٹی پاننگانے کہ چارمیکو جوائنٹ کمیشن میٹنگ نا وزارتی کہول آ اسلام آباد اٹی اڈتننگ، ہڑتوم آ کنڈآتا سلابت نا ارٹ میکو سیشن نا پتراجایا ٹی بڑزکو کمامدارآتا کہول آ اڈتننگ، چارمیکو جوائنٹ کمیٹی میٹنگ و دفاعی کمکاری آ جوائنٹ کمیٹی نا 14می دیوان نا دمدستی اڈتننگ آہم امنا کننگا۔ ہڑتوم آ راہشونک ساڑی حالیت و گرج آتے مون آ تخسا تعلقداری تے پین سوگو کننگ، واپار و زرکاری خاص وڑاٹ بدل گیگ توانائی، قدرتی وسیلہ، ایروسپیس و ایرونا ٹیکل، ڈیجیٹل ٹیکنالوجی، آرٹیفیشل انٹیلیجنس و ای کامرس نا بشخ آتے ٹی تعلقداری تے پین ودفنگ، چیمبر آف کامرس و انڈسٹری خاص وڑاٹ بزنس کونسلز نا است بڈی، نجی کہول آ ہڑتوم آ کنڈآتا واپار و زرکاری و تعلقداری تے مون آ دننگ آ امنا کریر۔ داڑتون اوار اوار پی آئی اے نا اسلام آباد۔کوالالمپور و کوالالمپور۔اسلام آباد براہ راست ساڑی آ جہاز آتیان بیدس لاہور آن کوالالمپور کن براہ راست جہاز آتا بناءِ کننگ، ملائیشیا نا ایئر لائن اسلام آباد۔ کوالالمپور۔اسلام آباد ساڑی آ روٹ انا کوڈ شیرنگ نا بست و بند آتیا غور، محصولات و ٹیکسیشن اٹی کاریم اٹ اتوک آ تکنیکس و ازباب آتا بابت آزموندہ آتا تبادلہ و کمکاری ءِ مون آ دننگ آہم امنا کننگا۔ اعلامیہ ٹی پاننگانے کہ دورہ نا وخت آ ہڑتوم آ راہشون تا ساڑی گری ٹی چندی معاہدہ غاتیا ہم دستخط مس ہرا ہڑتوم آ ملک آتا نیام اٹ تزویراتی شریداری ءِ پین سوگو کیرہ۔ ہڑتوم آ راہشونک ملائیشیا ٹی کاریم کروک آ پاکستانی خواری کش آتا سوشل سیکورٹی پروٹیکشن کن وزارت اوورسیز پاکستانیز و انسانی وسیلہ غاتا شونداری و ملائیشیا نا سوشل سیکورٹی آرگنائزیشن نا نیام اٹ کمکاری نا مفاہمت آ دستخط آتا خیرمقدم ءِ کریر۔
