اسلام آباد۔ 05 فروری (اے پی پی) صدر مملکت ڈاکٹر عارف علوی پارینے کہ اینو نن مقبوضہ جموں و کشمیر نا نرزور و تینا ہیت آ سلوک الس تون یکجہتی نا درشانی ءِ کینہ ہرافک ظلم و جور آن آجوئی و تینا حق خودارادیت کن ہفت دہائی آن برجا جہد اٹی بے مثل قربانی تسنو، 5 اگست نا بھارتی غیر کانودی کارروائی مقبوضہ جموں و کشمیر و پاکستانی الس نا نیام اٹ تعلقداری تے پین سوگو کرینے، پاکستان ہر فورم آ جموں و کشمیر نا ویل ءِ چست کرسا کیک، حکومت و پاکستانی الس اقوام متحدہ نا سلامتی کونسل نا قرارداد آتا رداٹ حق خودارادی ملنگ اسکان کشمیری الس نا سیاسی، اخلاقی و سفارتی مخ تفی ءِ برجاتخنہ۔ داخیال آتا درشانی ءِ او یوم یکجہتی کشمیر نا وخت آ جاری تینا کلہو اٹی کرے۔ اوپارے کہ دا سخت مشکلات و خوف انا برخلاف ہمت و ظلم انا برخلاف اومیت نا جنگ مسنے ولے دا وڑتا کمک اٹ کشمیری الس ہروارآنبار مستقل بے رحمی نا گواچی مسر و گمر ءِ کہ بھارت اوفتے مسخر کننگ اٹ بے سہب مس۔ اونا پاننگ ئس کہ 5 اگست آ تینا غیر کانودی و اسہ کنڈی کارروائی تا کمک اٹ بھارت اقوام متحدہ نا سلامتی کونسل نا تعلقدار قرارداد آتا براہ راست خلاف ورزی و کشمیری تے پین بربریت نا شست کننگ نا کوشست کرے، بھارتی بربریت و ظلم ءِ دنیا مسترد کرے و داسہ اونا جمہوریت جہانی برادری نا مون آ لغڑ مسنے۔ ڈاکٹر عارف علوی پارے کہ پاکستان ہر فورم آ جموں و کشمیر نا ویل ءِ چست کرسا کیک، 5 اگست نا بھارتی غیر کانودی کارروائی مقبوضہ جموں و کشمیر و پاکستان نا الس نا نیام اٹ تعلقداری تے پین سوگوی تسنے، حکومت و پاکستانی الس اقوام متحدہ نا سلامتی کونسل نا قرارداد آتا رداٹ کشمیری الس نا سیاسی، اخلاقی و سفارتی مخ تفی ءِ برجاتخرہ۔
