اسلام آباد۔ 05 فروری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان مچ آ دنیا ٹی کشمیر نا ویل ءِ بے کچ دلیرانہ وڑاٹ تالان کرے، مظلم کشمیری الس کمک کن پاکستانی ایڑھ و ایلم تا کنڈآ ہُننگ ءُ، پاکستانی سرکڑدہ و الس کشمیری تا ٹھپ آتے تینا جون آ محسوس کیرہ، تینا آجوئی و وطن نا دفاع کن دتر نا آخیریکو پڑی اسکان جنگ کینہ، مقبوضہ کشمیر آ بھارتی غیر کانودی تسلط نا چٹفنگ نا دے بسنے۔ داخیال آتا درشانی ءِ او کشمیری ایڑھ و ایلم تتون یکجہتی نا درشانی ءِ کننگ کن کشوک آ ریلی آن تران کرسا کرے۔ ریلی ٹی پارلیمنٹ نا زالبول باسک آک و چندی بشخ آتیان تعلق تخوک آ زالبول آتا بھلو کچ اس بشخ ہلکر۔ ڈاکٹر فردوس عاشق اعوان پارے کہ کیہی دہائی آن بھارت مقبوضہ کشمیر آ غیر کانودی کوزہ کرینے و ہموڑے انسانی حق آتا بدترین خلاف ورزی مننگ ءِ، دا سہ مقبوضہ کشمیر آ بھارتی غیر کانودی تسلط نا چٹفنگ نا دے بسنے۔ اوپارے کہ مظلوم کشمیری الس کمک کن پاکستانی ایڑھ و ایلم تا کنڈآ ہُننگ ءُ، نن ہر پلیٹ فارم آ کشمیری تا حق اکن جنگ کننگ اُن۔ اونا پاننگ ئس کہ ننے کشمیری ایڑھ و لمہ و چناتا پبی احساس ارے و اوفتا ڈکھ و دڑد ءِ نن تینا ڈکھ و دڑ سمجھنہ، مقبوضہ دامان اٹی ایڑھ و لمہ غاتا عزت آک پامال و بنداوی انسانی حق انا لس خون مننگ ءِ۔ خصوصی کمکار پارے کہ پنچ فروری کشمیری تتون یکجہتی نا درشانی کن تجدید عہد نا دے ءِ و دختران پاکستان جہد آجوئی ٹی دختران کشمیر تون یکجہتی نا درشانی ءِ کننگ کن داڑے مچ مسنو۔ ڈاکٹر فردوس عاشق اعوان پارے کہ دختران پاکستان اقوام متحدہ غان خواست کیرہ کہ او تینا قرارداد آتا رداٹ کشمیری تے اوفتا حق، حق خودارادیت ترفے۔ اوپارے کہ اینو کشمیر اٹی انسانی حق آتا بدترین خلاف ورزی مننگ ءِ، گوازی تا پڑتے ویران کرسا فوجی چھاؤنی جوڑ کننگانے۔ داوڑنا حالیت آتے ٹی جہانی مبصرین، انسانی حق آتا تنظیم و میڈیا بایدے تینا کڑد ءِ ادا کیرا نتئے کہ کشمیری الس ءِ اوفتا پیدائشی حق خودارادیت بایدے ملے۔ اوپارے کہ وزیراعظم عمران خان مچ آ دنیا ٹی کشمیر نا ویل ءِ بے کچ دلیرانہ وڑاٹ تالان کرے، او کشمیری تا سفیر، وکیل و ترجمان ءِ۔ اونا پاننگ ئس کہ پاکستانی سرکڑدہ و الس کشمیری تا ٹھپ آتے تینا جون آ محسوس کیرہ۔ خصوصی کمکار پارے کہ اینو ریلی ٹی پاکستان نا دختر آتون اوار چنکا چناک ہم بسنو، ہرا اقوام متحدہ نا نمائندہ و مبصر آتے تینا قرارداد اس جمع کرفرہ ہراٹی اوفتا کنڈآن دا کلہو مریک کہ او کشمیری چناتے تون سلوک ءُ، ارٹ میکو قرارداد دختر ان پاکستان نا کنڈآن جمع کرفنگک ہرانا مسخت جہانی برادری نا ضمیر ءِ سرفنگ نا ءِ۔ اوپارے کہ ای سپہ سالار پاکستان نا بیان ءِ ولدا پاوہ کہ نن آخیریکو گولی، آخیریکو سباپئی و دتر نا آخیریکو پڑی اسکان وطن نا دفاع کن جنگ کینہ۔ ڈاکٹر فردوس عاشق اعوان پارے کہ بھارت نا سیکولر ریاست نا دعوایٰ دنیا نامون آ پاش مسنے۔ داکان پد خصوصی کمکار حوالکاری و شین کاری زالبول پارلیمنٹرین آتون اوار پاکستانی الس نا کنڈآن کشمیر نا بابت اقوام متحدہ نا اسلام آباد آفس اٹی نمائندہ جولین ہارنیز ءِ قرارداد اس پیش کرے۔
