اسلام آباد۔ 05 فروری (اے پی پی) وزیر خارجہ مخدوم شاہ محمود قریشی پارینے کہ دادے پہہ مننگ بھاز المی ءِ کہ بھارت 5 اگست 2019ء نا غیر کانودی و اسہ کنڈی گام گیج آن نئے بیرہ جموں و کشمیر آ اقوام متحدہ نا سلامتی کونسل نا قرارداد و جہانی کانود نا خلاف ورزی ءِ کرے بلکن بھارت تینٹ تینا دستور نا پامالی ءِ ہم کرے، حقیقت تو دادے کہ کشمیری تا درستی راستی ءِ چٹفنگ و ’کشمیریات‘ نا تصور ءِ چٹفنگ نا کوشست ئس۔ داخیال آتا درشانی ءِ او 5 فروری آ یوم یکجہتی کشمیر نا وخت آ جاری تینا کلہو اسے ٹی کرے۔ مخدوم شاہ محمود قریشی پارے کہ بھارت نا گمان و گمر ئس کہ تینا کوزہ ٹی جموں وکشمیر نا جغرافیائی سلامتی ءِ شیف بڑز کرسا او کشمیری الس نا تیناروا حق انا دوئی کننگ نا جوزہ ءِ مجروح کننگ اٹ سرسہب مریک یا تو اودے اوفتا بنداوی حق، سلاہ درشانی نا حق آ سمجھوتہ کننگ آ بیوس کیک ولے اودے دا ہڑتوم آ مسخت آتے ٹی بدترین بے سہبی نا مون ءِ خنوئی تما۔ وزیر خارجہ پارے کہ جہانی برادری، انسانی حق انا تنظیم، جہانی میڈیا و سول سوسائٹی غٹ بھارت آن مقبوضہ کشمیر نا الس آ ظلم و ستم و جور ءِ چٹفنگ نا خواست کرینو، کشمیری الس نا مخ تفی ٹی دنیا نا کم و ود غٹ بھلا شار تیٹی برانزی مچی مسنے، اقوام متحدہ و دنیا نا بھلا ملک آک بھارت نا مذمت ءِ کرسا کشمیری تتون یک جہتی نا درشانی ءِ کریر وخت اس کہ اقوام متحدہ نا سلامتی کونسل شش تُو انا وخت اٹی مسہ وار جموں و کشمیر نا ویل آ سجفیں۔ اوپارے کہ جہانی برادری نا کنڈآن آزمائش نا دا ساہت اٹی مقبوضہ جموں و کشمیر نا الس نا مخ تفی ٹی گڑاس زیات کننگ نا گرج ءِ، جہانی برادری بنداوی آجوئی و کشمیری تا بنداوی انسانی حق انا رکھ انا مخ تفی ٹی پبی کڑد ادا کے و بھارت آ زور شاغے کہ اقوام متحدہ نا، فیکٹ فائنڈنگ مشن، ءِ بھارت نا کوزہ ٹی جموں وکشمیر آ ہِننگ نا موکل ایتے تانکہ اوہموڑے انسانی حق انا لتاڑتا راستکی تے تینٹ جوان خنر۔ اونا پاننگ ئس کہ بھارت اقوام متحدہ نا فوجی مبصر پڑک بھارت وپاکستان ءِ بھارت نا کوزہ ٹی جموں وکشمیر اٹی تینا فرض انا انجام تننگ کن ہمینگیا ہِننگ نا موکل ایتے تانکہ او مقبوضہ جموں و کشمیر اٹی انسانی حق آتا خلاف ورزی تا راستکی تا بارواٹی معلومدار مننگ کیر۔ وزیر خارجہ پارے کہ ای پاکستان نا دا پکا عزم انا اسہ وار ولدا درشانی ءِ کیوہ کہ نن بہادر کشمیری الس نا عزت و وقار نا رکھ و اقوام متحدہ نا سلامتی کونسل نا قرارداد آتا رداٹ اوفتا ناقابل تنسیخ و روا استصواب رائے نا حق انا دوئی کننگ اسکان اوفتا جہد اٹی پبی سیاسی، سفارتی و اخلاقی مخ تفی ءِ برجاتخنہ۔
