اسلام آباد۔ 05 فروری (اے پی پی) وزیر خارجہ شاہ محمود قریشی پارینے کہ اسہ پاکستانی اس ہم کشمیر نا ویل آ سودا بازی نا سجفنگ کپک، پاکستان نا چنا چنا، غٹ سیاسی سرکڑدہ و ہر ادارہ دا جہد اٹی کشمیری تتون سلوک ءُ، تدوک آ دے پارلیمنٹ دا بابت اسہ امنائی قرارداد اس ہم منظور کرے، سلاہ درشانی نا حق انا دوئی کننگ اسکان کشمیری تا سیاسی، سفارتی و اخلاقی مخ تفی ءِ برجاتخنہ، بھارت نا 5 اگست 2019ء نا گام گیج اقوام متحدہ نا قرارداد آتا خلاف ورزی ءِ، بھارت تینٹ تینا دستور ءِ ہم لتاڑانے، داوڑ کشمیری تا درستی راستی و کشمیریات نا تصور ءِ چٹفنگ نا کوشست کننگا، اقوام متحدہ نا ’فیکٹ فائنڈنگ مشن‘ ءِ جموں و کشمیر آ ہِننگ نا موکل تننگے تانکہ او ہموڑے انسانی حق انا پامالی تا راستکی تے تینٹ خنر، بھارت اودیم کننگ خواپک تو جہانی میڈیا ءِ تینا کوزہ ٹی جموں و کشمیر آ ہِننگ نا موکل ایتے۔ داخیال آتا درشانی ءِ او چارشنبے نادے آ یوم یکجہتی کشمیر نا بابت بیان اٹی کرے۔ وزیر خارجہ پارے کہ اینو نا دے ننے تینا کشمیری ایلم تے اسہ پیدوار ءُ کلہو اس تروئیءِ کہ پاکستان نا چناچنا، غٹ سیاسی سرکڑدہ و ہر ادارہ دا جہد اٹی اوفتے تون سلوک ءِ، کنے خوشی ءِ کہ تدوک آ دے پارلیمنٹ دا بابت اسہ امنائی قرارداد اس ہم منظور کرے۔ وزیر خارجہ پارے کہ کشمیر نا ویل ءِ جہانی کہول آ تالان کننگ اٹ ہم ننے نمان سرسہبی دوئی مسنے، انسانی حق کمیشن اٹی پاکستان ءِ سرسہبی ملا و دا کمیشن مقبوضہ کشمیر اٹی انسانی حق آتا خلاف ورزی ءِ پک کرے۔ اوپارے کہ امریکی کانگریس اٹی 2 وار مقبوضہ کشمیر اٹی بھارتی بیدادی آ شرہ مسنے، یورپی پارلیمنٹ اٹی ہم دا بابت شرہ مسنے داکان بیدس 50 سال آن پد اقوام متحدہ نا سیکورٹی کونسل اٹی ہم کشمیر نا ویل آ شرہ مس۔ وزیر خارجہ پارے کہ کشمیر نا ویل آ مچ آ قوم یکجا ءِ، اسہ پاکستانی اس ہم کشمیری نا سودا بازی نا بارواٹ سجفنگ کپک، بھارت کشمیر اٹی حالیت آتے نارمل مننگ نا کنڈآدننگ نا دروغ انا تاثر ایتک، حالیت آک اگہ نارمل ءُ تو شش تُو آن کرفیو انت اکن خلکونے، مودی سرکار ءِ خلیس ءِ کہ کرفیو چٹا تو مخلوق آک پیشن پیش تمرہ۔ اونا پاننگ ئس کہ مقبوضہ جموں و کشمیر اٹی کوزہ گر بھارتی فوج کشمیری سرکڑدہ غاتے نظر بند کرینے، اینو مچ آ دنیا ءِ کشمیر نا حالیت آتیان سماءِ، راستکی تیان خن تے اسہ کنڈ کننگ انگ ءِ، وخت اس کہ دنیا واپاری مصلحت آتا رداٹ چپ ءِ۔ مخدوم شاہ محمود قریشی پارے کہ لابنگ ہر حکومت و ریاست نا حق ءِ، کشمیر نا ویل آ مصلحت آتا پد پشت بیرہ لابنگ اف بلکن فائدہ غاک ءُ۔ علاقائی فائدہ غاتے ہُننگ انگ ءِ، ہراتم فائدہ غاک اڑاند مریر تو لابنگ شیف تمک۔ اوپارے کہ بھارت نا 5 اگست 2019ء نا گام گیج اقوام متحدہ نا قرارداد آتا خلاف ورزی ءِ، اونا پاننگ ئس کہ ای پاکستان نا دا پکا عزم انا اسہ وار ولدا پاکستانی قوم انا عزم انا درشانی ءِ کننگ خواوہ کہ سلاہ درشانی نا حق انا دوئی کننگ اسکان کشمیری تا سیاسی، سفارتی و اخلاقی مخ تفی ءِ برجاتخنہ۔
