مظفر آباد۔ 05 فروری (اے پی پی) وزیراعظم آزاد کشمیر راجہ محمد فاروق حیدر خان پارینے کہ پنچ فروری نا دے تینا تحریک آجوئی ٹی ریاست جموں و کشمیر نا الس تون پاکستان نا الس نا بے مثل یکجہتی آ اوفتا منت وار اُٹ۔ اینو پاکستانی الس ریاست جموں و کشمیر نا خلقت نا بنداوی حق حق خودارادیت ہرانا اقوام عالم اوفتے تون وعدہ کریسس، نا تجدید و ریاست جموں و کشمیر نا مقبوضہ بشخ اٹی ہراڑے بھارتی فوج غاصبانہ کوزہ کرینے و او اوفتا حق آن اوفتے محروم کننگ کن ہموڑے کن ءِ، کشمیر نا ایلم، ایڑھ، مسڑ، مجاہد، سیاسی کارندہ و بزرگ آتون یکجہتی نا درشانی ءِ کننگ ءُ۔ تدوک آ ہفت دہائی آن پد ہم پاکستان نا الس کشمیری تا دا حق خودارادیت تون ہمووڑ سلوک ءُ ہراوڑ اوفتے تون بانی پاکستان حضرت قائد اعظم محمد علی جناح وعدہ کریسس۔ 19 جولائی 1947 آ کشمیری الس نا سرکڑدہ غاک قرارداد منظور کریر ہراٹی ریاست جموں و کشمیر نا مسلمانک الحاق پاکستان نا فیصلہ ءِ کریسر۔ اوکان پد ہراتم سازش آک زور ہلکر و کشمیری الس نا حق رائے دہی ءِ بھارت نا سنگینیک غصب کریر تو باندات اقوام متحدہ نا سلامتی کونسل اٹ سرمس ہراڑے دا فیصلہ ءِ کننگاکہ کشمیری الس رائے شماری نا کمک اٹ تینا آخبت نا فیصلہ ءِ کیرہ۔ ہفتاد سال انا وخت تدینگ انگ آن پد ہم ہندوستان ہرا تینٹ اقوام متحدہ ٹی کشمیری تے اوفتا حق رائے شماری تننگ نا فیصلہ کریسس اینو اسکان کشمیری تے اوفتا حق تننگ نا کسر اٹ اڑاند شاغنگ ءِ و او 5 اگست آ اسہ کنڈی گام گیج کرسا کشمیر نا خصوصی حیثیت ءِ چٹفسا اودے تینا یونین ٹیریٹری جوڑ کننگ نا کوشست کرینے ولے کشمیری الس نا آہنی عزم بھارت نا دا چال ءِ بے سہب کرینے۔ پاکستانیک مشکل نا داساہت اٹی تینا کشمیری ایلم تا پبی کمک ءِ کرینو و او اوفتا جہد آجوئی ٹی اوفتے تون سلوک ءُ۔ آخیری سپاہی، آخیری گولی و آخیری دم اسکان کشمیری تا جہد تون تفنگ نا بیانیہ حریت پسند آتا جوزہ ءِ پین سوگو کرینے و او مست آن ہم زیات عزم اتون تینا آجوئی نا تحریک ءِ روشنا تخانو۔ یوم یکجہتی کشمیر نا وخت آوزیراعظم آزاد کشمیر تینا کلہو اٹی پارے کہ مقبوضہ کشمیر نا تہہ ٹی بھارتی فوج، اودیم ایجنسی تا کنڈآن و دوتکی حکومت نا پالیسی تا سوب آن ہموڑے ہندن ءُ کانود اس نافذ کننگانے ہراڑان ہموجاگہ نا خلقت نا بنداوی حق ءِ صلب کننگانے ہموڑے کشمیری تا کشت و خون ءِ کننگ انگ ءِ ہرانا مثال مہذب دنیا ٹی ملیپک۔ کوزہ گر فوج، پولیس، بی ایس ایف ایلو کوزہ گر فورس آک ریاست جموں و کشمیر نا تہہ ٹی ریاستی دہشت گردی کننگ ءُ، کشمیری تا خون ءِ کننگ انگ ءِ، پیلٹ گن آتا کاریم اٹ اتنگ آن اوفتا خن تا بینائی ءِ دننگ انگ ءِ، ہزار آ کودک خلقت داوخت آ جیل تیٹی بند ءُ و ہزار آ خلقت ءِ شہید کننگانے ہرافتا اوفتا خاہوت ءِ ہم سمااف۔ بے کچ گم گار آقبرآک بھارتی بیدادی نا شاہدی ءُ۔ ای ریاست جموں و کشمیر نا بہادر مار و مسن تا جوزہ حریت ءِ سلام پیش کیوہ و اوفتے باوری کرفیوہ کہ پاکستان آزاد کشمیر و گلگت بلتستان نا الس نم تون ہم کوپہ سلوک ءُ نم تینے تنیا تکپبو، ظلم انا نن چٹنگ والا ءِ و انشاء اللہ تعالیٰ آجوئی نا دے زوت پاش کیک۔ دا پک ءِ ہرادے رد کننگ مفک و نن الحاق پاکستان نا مزل ءِ امر کہ مرے رسینگنہ۔
