مظفر آباد۔ 05 فروری (اے پی پی) صدر آزاد جموں و کشمیر سردار مسعود خان پارینے کہ 05 فروری نا دے پاکستانی و کشمیری تا لازوال رشتہ نا درستی راستی ءِ ہرادے کیہی سال آتیان پبی وڑاٹ اڈتننگک، دا پاکستانی و کشمیری تا نیام اٹ مذہبی، دودوربیدہ و راجی ہم آہنگی نا درستی راستی ءِ، کشمیری مسلمانک پاکستان نا جوڑ مننگ آن مست تینا آخبت ءِ نظریاتی وڑاٹ پاکستان تون وابستہ کریسر، ننے دا تاریخی فیصلہ غا گمر ءِ انتئے کہ پاکستانیک آزمائش و مشکل نا ہروخت آ کشمیری الس ءِ تنیا الیتنو، پاکستان و کشمیر زیل و سُو ءُ، پاکستانی قوم و پاکستانی حکومت نا کنڈآن یوم یکجہتی کشمیر ءِ اڈتننگ آن تحریک آجوئی کشمیر اٹی پوسکن ءُ ساہ اس شاغانو۔ داخیال آتا درشانی ءِ او یوم یکجہتی کشمیر نا وخت آ تینا کلہو اٹی کرے۔ اوپارے کہ مقبوضہ کشمیر اٹی کوزہ گر بھارتی فوج انسانی حق آتا لتاڑ تیا بھارت نا ترندی اٹ مذمت ءِ کرسا اقوام عالم آن خواست کیوہ کہ او مقبوضہ کشمیر اٹی بھارتی فوج انا انسانی حق آتا لتاڑ ءِ بند کرفے و اقوام متحدہ نا منظور کروک قرارداد آتیا عملدرآمد ءِ پک کے۔ کشمیری الس جیرت، پامردگی و حوصلہ اتون تینا موقف آ سلوک ءُ۔ اوتینا نصب العین ءِ الیتنو، او ہچ ءُ حالیت اسے ٹی تینا موقف آن دزکش مفسہ۔ برہان مظفر وانی شہید انا مشن ءِ ہلسا ورناچینک کاٹم آ کفن تفینو۔ نن بھارت آ پیدوار کینہ کہ او کشمیری تا بنداوی حق، حق خودارادیت اٹ اڑاند مف بلکن سنجیدگی نا درشانی ءِ کرسا مذاکرات نا کمک اٹ دا ویل ءِ ایسر کے۔ کشمیری الس ریاست جموں و کشمیر ءِ ناقابل تقسیم وحدت تکرہ۔ نن دا پیدوار کننگ خوانہ کہ کشمیری الس کن ہمو ایسر امنا نا قابل مریک ہرا کشمیری الس نا است خواہی و اقوام متحدہ نا قرارداد آتا رداٹ مریک و ہندا اونا سوگو و پائیدار ایسرمریک۔
