حکومت جان جوڑی نا ویل آتا ایسری ءِ ٹاسک و چیلنج اس تکک و اوفتا ایسری کن کاریم مننگ ءِ
کوءٹہ ۔ 04 فروری (اے پی پی) وزیراعلیٰ بلوچستان جام کمال خان پارینے کہ کینسر ہسپتال صوبہ نا گرج و الس نا دیرینہ خواست ئس اللہ نا فضل اٹ ساڑی حکومت پورو کننگ ءِ، اللہ تعالیٰ نا شکر ءِ اداکینہ کہ دا خیر انا کاریم اٹ بشخ ءِ شاغنگ نا توفیق تس ، حکومت جان جوڑی نا ویل آتا ایسری ءِ ٹاسک و چیلنج اس تکک و اوفتا ایسری کن کاریم مننگ ءِ، دا نن پاپنہ کہ غٹ ویل آک ایسر مسنو ولے خلوص نیت اتون ویل آتا ایسر کننگ نا کوشست برجاءِ ۔ داخیال آتا درشانی ءِ او شیخ خلیفہ بن زید النہیان ہسپتال کوءٹہ ٹی کینسر بلاک نا بنداو ءِ تخنگ نا دود آن تران کرسا کرے، صوبائی وزیر آک، قائد حزب اختلاف ملک سکندر خان ایڈووکیٹ، اسمبلی نا باسک ، علاقہ سرکڑدہ ، آئی جی پولیس و ایلو کمامدار آک، طب انا چا ہندار و پیرامیڈیکس ئسک ہم داوخت آ ساڑی ئسر ۔ وزیراعلیٰ تینا تران اٹی پارے کہ اینو جہانی یوم کینسر ءِ ، دامناسبت اٹ کوءٹہ ٹی بلوچستان نا اولیکو کینسر بلاک نا بنداو ءِ تخنگ انگ ءِ ، وزیراعلیٰ پارے کہ بلوچستان ایجوکیشن انڈومنٹ فنڈ انا وڑآ جان جوڑی نا بشخ اٹی بلوچستان عوامی انڈومنٹ فنڈ انا قیام ءِ ہم عمل اٹ اتنگانے ہرانا کمک اٹ نیزگار و حقدار خلقت ءِ کینسر تون اوار ایلو موذی مرض آتے کن ملک انا بھلا ہسپتال آتے ٹی حکومتی خڑچ آتیا درمان نا آسراتی فراوان کننگ انگ ءِ ، و داوخت اسکان 675مریض دا آسراتی آن فائدہ ہرفینو ۔ وزیراعلیٰ پارے کہ کینسرکون آ مرض آتا درمان آسان اف ہراڑکن زیات وسیلہ غاتا گرج مریک و خلقت تینا جائیداد و اُراتسکان سودا کرسا کڑزدار مریرہ ، دارداٹ بلوچستان اٹی کینسر ہسپتال نا گرج شدت اٹ محسوس کننگاکہ، ساڑی حکومت دا ڈٹ ءِ صوبائی پی ایس ڈی پی نا بشخ کرے ۔ دانا کریڈٹ ہچ کس ءِ ملپک و نئے دا سیاسی مسخت نا بشخ ءِ ۔ اوپارے کہ داڈٹ انا سرجم جاچ ءِ ہلنگانے ننا چاہندارآک شوکت خانم تون اوار ایلو ہسپتال آتیا ہنار و ہموجاگہ نا چاگڑد، ازباب و درمان نا وڑتا جاچ ءِ ہلکر ہرانا رداٹ دا ڈٹ ءِ تیار کننگا ہراٹی کینسر نا تشخیص و پوسکن آ درمان نا آسراتیک دوئی مریرہ و بلوچستان نا خلقت ءِ کینسر نا درمان کن ایلو صوبہ غاتیا ہنوئی تمپک ، داکان مست سیکرٹری جا ن جوڑی مدثر وحید ملک سپاسنامہ اس پیش کرسا ڈٹ انا سرجم آتیان معلومدار کرے ۔ وزیراعلیٰ ڈٹ انا تختی نا نقاب کشائی ءِ کرے ہراڑے اودے ڈٹ انا سرجم آتیان معلومدارکرے ۔ کینسر بلاک شش وارڈ ز و 140 کٹ و 30 پرائیویٹ کمرہ غاتیا تالا ن مریک ہراڑے کینسر نا درمان نا غٹ پوسکن آ آسراتیک دوئی مریرہ ۔
