وزیراعظم عمران خان نا تینا ملائیشین ہم منصب ڈاکٹر مہاتیر محمد تون اوار اسیجا پریس کانفرنس

پتراجایا ۔ 04 فروری (اے پی پی) وزیراعظم عمران خان و اونا ملائیشین ہم منصب ڈاکٹر مہاتیر محمد ہڑتوم آ ملک آتے ٹی سوگو اقتصادی کمکاری آ مبنی تعلقداری تے مون آ دننگ کن واپار و زرکاری نا وارخواہی تے کاریم اٹ اتنگ آ امنا کرینو ۔ ہڑتوم آ راہشونک سے شنبے نادے آ پی ایم آفس پتراجایا ٹی اسیجا پریس کانفرنس آن تران کرسا واپار، زرکاری، دفاع، کانود نا نفاذ، سیل و سوات و تعلیم نا بشخ آتے ٹی تین پہ تینی کمکاری آ گپ و تران کریر ۔ وزیراعظم عمران خان پارے کہ اونا اِرادے ئی دورہ ملائیشیا نا مسخت ہڑتوم آ ملک آتا نیام اٹ واپار و زرکاری نا بشخ آتے ٹی کمکاری نا گمان آتا رداٹ تعلقداری تے پین سوگو کننگ ناءِ ۔ اوپارے کہ نن گیشتر واپاری تعلقداری ، زرکاری و دفاعی بشخ اٹی اسیجا کمکاری ءِ مون آ دننگ نا بارواٹی گپ و تران کرین ۔ وزیراعظم عمران خان پارے کہ پاکستان تینا تزویراتی حیثیت آن زرکاری کن بھلو مارکیٹ اس جوڑ مسنے و دا خاص وڑاٹ چین ۔ پاکستان اقتصادی راہداری و تینا خصوصی اقتصادی زون تا کمک اٹ چین نا مارکیٹ اسکان رسینگ فراوان کیک ۔ اوملائیشین وزیراعظم مہاتیر محمد نا کشمیری تیکن توار ہرفنگ آ منت واری ءِ ہرفے ہرا بھارتی حکومت نا کنڈآن تدوک آ 6 تُو آن کرفیو ٹی گھیڑ ءُ ۔ وزیراعظم ڈاکٹر مہاتیر محمد ءِ پارے کہ نی کشمیری تیکن انصاف نا ءِ کرینس ہراڑکن نن نا منت وار اُن ۔ اوپارے کہ ننے دا معلوم مسنے کہ بھارت کشمیر نا مخ تفی آ ملائیشیا ءِ پام آئل نا درآمد ءِ توننگ نا دھڑکو تسنے، پاکستان اونا ازالہ ءِ کننگ کن ہر وڑ کمک کیک ۔ ڈاکٹر مہاتیر محمد پارے کہ وزیراعظم عمران خان تون اوڑدہی ٹی تینا خلقت کن وارخواہی ودی کننگ نا بابت تین پہ تینی فائدہ غاتا چندی باندات آتیا گپ و تران کننگانے ۔ ساڑی دور انا چیلنج آتا مقابلہ ءِ کننگ کن المی گیشتر کمکاری نا بنداو آ ننا تعلقداریک اسہ پوسکن ءُ دروشم اس اختیار کرینو ، نن ہڑتوم آ ملک آتا گچین فائدہ ٹی ہڑتوم آ کنڈآتا تعلقداری تے پین سوگو کننگ نا چرجوئی ٹی شریداری کن پرعزم اُن ۔ اوپارے کہ وزیراعظم عمران خان و ای ہڑتوم آ کنڈآتا کمکاری تون اواراوار علاقائی و جہانی باندات آتیا ہم گپ و تران کرینن، دا ہڑتوم آ کنڈآتا تعلقداری تے سوگو کننگ کن ننا تین پہ تینی عزم انا عکاس ءِ ۔ داوخت آ کڑدہ غاک غٹ کہول آتیا ڈل آتا ہن و بر ءِ ودفنگ آ ہم امنا کریر تانکہ ہڑتوم آ کنڈآتا تعلقداری نا آخبت نا لاءحہ عمل نا تعین مننگ کے ۔ ڈاکٹر مہاتیر محمد پارے کہ اوڑدہی ٹی ہڑتوم آ ملک آتا چندی وزارت آتا نیام اٹ کمکاری ءِ پین ودفنگ نا گرج آ زور شاغنگانے و ہڑتوم آ ملک آتا باندات خارجہ نا وزارت آتا کمامدار آتا نیام اٹ ہڑتوم آ کنڈآتا سلابت نا سرسہب اڈتننگ نا خیرمقدم ءِ کرینن ۔ اقتصادی کمکاری نا بابت آن اوپاریر کہ ہڑتوم آ ملک آتا نیام اٹ واپار و زرکاری نا بشخ اٹی شریداری ءِ مون آ دننگ ، چندی زرگزران تا نیام اٹ نیٹ انا قیام و نجی بشخ انا نیام اٹ رابطہ غاتا بھلو وارخواہی اس ارے ۔ اوملائیشیا و پاکستان نا نیام اٹ خڑکی اقتصادی شریداری نا اہمیت نا درشانی ءِ کرسا دا چرجوئی ٹی 8 نومبر 2007 ء آ کوالالمپور اٹی طے مروک معاہدہ غا است جمی نا درشانی ءِ کریر ہراٹی اہم بشخ آتے ٹی بروک اڑاند آتے مر کننگ و واپار اٹی توازن نا بابت باقاعدہ ہیت وگپ آ امنا کننگانے ۔