اسلام آباد۔ 04 فروری (اے پی پی) پاکستان تون اوار مچ آ دنیا ٹی رہینگوک پاکستانیک کشمیری تتون پبی یکجہتی کن یوم یکجہتی کشمیر ءِ چارشنبے نادے آ پبی وڑاٹ اڈ ایترہ، وزیراعظم پاکستان عمران خان مظفر آباد اٹی آزاد جموں و کشمیر کانود ساز اسمبلی و کشمیر کونسل نا اسیجا دیوان آن تران کیک، پگہ (چارشنبے نادے آ) لس چھٹی مریک، پاکستان و آزاد کشمیر ءِ ملفوک آ غٹ اہم پلہ غاتیا انسانی دوتا زمزیر جوڑ کننگک۔ بھارت نا کنڈآن مقبوضہ کشمیر نا خصوصی حیثیت نا چٹفنگ و کیہی تُو آن لاک ڈاؤن نا سوب آن اینخو نا سال یوم یکجہتی کشمیر ءِ مہالو آن پین وڑ اڈتننگک۔ دادے انا مناسبت اٹ یات گاری ڈاکٹ ٹکٹ جاری کننگک۔ دے انا 10 بجہ غا اسہ منٹ اکن چپی اختیار کننگک ہرانا وزارت داخلہ نا کنڈآن نوٹیفکیشن ہم جاری کننگانے۔ وزیراعظم عمران خان نا پرمان تے مون آ تخسا اینخو نا سال یوم یکجہتی کشمیر نا دود آتا بنا27 جنوری آن کننگاسس۔ یوم یکجہتی کشمیر نا وخت آ ہر چار آ صوبائی دارالحکومت آتے ٹی ریلی تیان صوبائی وزیر اعلاک تران کیرہ وخت اس کہ ہر ضلع نا کہول آ ریلی اڈتننگک۔ غٹ جہانی بالی پٹ و ریلوے اسٹیشن تیا یوم یکجہتی کشمیر نا بابت بینر خلنگانے۔ پی ٹی اے نا کنڈآن یوم یکجہتی کشمیر نا بابت 10 کروڑ خصوصی ایس ایم ایس مون تننگک۔ بنجائی تعلیمی ادارہ غاتے ٹی شرہ و سرحال نویسی نا مقابلہ مریک۔ پاکستان سپورٹس بورڈ انا کنڈآن زالبول آتا نیام اٹ ہاکی و نرینہ غاتا فٹ بال میچ اڈتننگک۔ داکان بیدس چندی شار تیٹی سٹی برانڈنگ کننگانے۔ اسلام آباد اٹی سینٹورس مال و صفا گولڈ مال اٹی کشمیر سیل انا کنڈآن خصوصی ڈیسک جوڑ کننگانے وخت اس کہ داڑے دستخطی مہم نا بست و بند ہم کننگانے۔ ایوان اقبال لاہور اٹی یوم یکجہتی کشمیر نا بابت عکسی نمائش نا بست و بند کننگانے۔ غٹ آرٹ گیلری تیٹی عکسی نمائش نا بست و بند کننگانے۔ غٹ فارن مشن آتے ٹی یوم یکجہتی کشمیر نا چرجوئی ٹی خصوصی پروگرام اڈتننگک۔
